web counter
LEXO PA REKLAMA!

SHKARKO APP

App Store
Google Play

E fundit!

x

Gjykata e BE-së heq nga lista e sanksioneve nënën e shefit të Wagner-it

8 Mars 2023, 15:15, Kosova & Bota CNA

Gjykata e BE-së heq nga lista e sanksioneve nënën e shefit

Gjykata e Përgjithshme e Bashkimit Europian ka anuluar sanksionet e vendosura ndaj nënës së Yevgeny Prigozhin, aleatit të ngushtë të presidentit rus, Vladimir Putin, njëherësh shefit të grupit të mercenarëve Wagner, që po marrin pjesë në luftën në lindje të Ukrainës.

Sanksionet e BE-së, që fillimisht ishin vendosur pas aneksimit të paligjshëm të Krimesë nga Rusia më 2014, përfshinin ndalim të udhëtimeve dhe ngrirjen e mundshme të aseteve të personave të përfshirë në veprimet e Moskës.

Violetta Prigozhina iu shtua listës së sanksioneve më 23 shkurt të vitit të kaluar, një ditë para se Rusia të niste pushtimin e Ukrainës. Ajo u fut në listën e sanksioneve së bashku me anëtarët e Qeverisë ruse, bankat, biznesmenët dhe ligjvënësit.

Prigozhina ishte ankuar për këtë vendim dhe gjykata e dytë më e lartë e bllokut europian më 8 mars vendosi se përfshirja e saj në listën e sanksioneve, duke u bazuar vetëm në faktin se ka lidhje familjare me Prigozhinin, nuk ishte dëshmi e mjaftueshme që ajo ishte bashkëfajtore në rolin që djali i saj ka luajtur në luftën në Ukrainë.

Prigozhin, oligarku që njihet edhe si “Kuzhinieri i Putinit” për shkak të bizneseve në fushën e gastronomisë, është pronar i grupit famëkeq të mercenarëve, Wagner, dhe ka qenë prapa fushatave "online" që synonin të ndërhynin në zgjedhjet amerikane.

Mercenarët e Prigozhinit kanë qenë jashtëzakonisht të përfshirë në pushtimin e Ukrainës, kryesisht në ofensivën që po vazhdon në qytetin lindor të Bahmutit, ku për muaj të tërë po zhvillohen luftime të ashpra.

BE-ja, sipas gjykatës, e futi nën sanksione Prigozhinën, 83-vjeçare, duke thënë se ajo ishte pronare e kompanisë Concord Management and Consulting LLC, që është pjesë e grupit Concord, të themeluar nga djali i saj më 2019. Ajo po ashtu ka biznese të tjera që janë të lidhura me bizneset e djalit të saj.

Gjykata tha se Prigozhina, edhe pse ka aksione në Concord, nuk ka qenë pronare e kompanisë që nga viti 2017. BE-ja po ashtu, sipas gjykatës, ka dështuar që të dëshmojnë se Prigozhina ka pasur në pronësi biznese të tjera të lidhura me djalin e saj, kur janë vendosur sanksionet.

“Edhe nëse [Prigozhin] është përgjegjës për veprimet që minojnë integritetin territorial, sovranitetin dhe pavarësinë e Ukrainës, lidhja midis zonjës Prigozhina dhe djalit të saj, që u krijua në kohën kur u miratuan sanksionet, bazohet vetëm në faktin se ata kanë lidhje familjare. Prandaj, kjo nuk është e mjaftueshme që ajo të përfshihet në listën e sanksioneve", u tha në deklaratën e gjykatës./REL





Lajmet e fundit nga