web counter
LEXO PA REKLAMA!

SHKARKO APP

App Store
Google Play

E fundit!

x

Departamenti i Drejtësisë shkarkon punonjësit e përfshirë në hetimet ndaj Presidentit Trump

28 Janar 2025, 09:34, Kosova & Bota CNA

Departamenti i Drejtësisë shkarkon punonjësit e

Departamenti i Drejtësisë njoftoi të hënën se ka shkarkuar mbi dymbëdhjetë punonjës që patën punuar me çështjet hetimore ndaj Presidentit Donald Trump, duke vepruar kështu me shpejtësi për të ndëshkuar juristët që u përfshinë në proceset hetimore.

Masat e shpejta ndaj prokurorëve të karrierës që punonin në ekipin e prokurorit të posaçëm Jack Smith janë shenja më e fundit e ndryshimeve brenda Departamentit të Drejtësisë dhe reflektojnë vendosmërinë e administratës për të larguar nga qeveria punonjësit që i konsideron jobesnikë ndaj presidentit.

Masat u ndërmorën në kundërshti me normat dhe pasuan transferimin e disa zyrtarëve të lartë të karrierës në divizione të ndryshme. Tradita e deritanishme mundësonte që prokurorët e karrierës ta vazhdonin punën në departament përgjatë administratave të presidentëve të ndryshëm dhe nuk ndëshkoheshin për përfshirjen në procese delikate hetimore. Shkarkimi i zyrtarëve u njoftua se hyri në fuqi menjëherë.

“Sot, prokurori i përgjithshëm në detyrë James McHenry i dha fund punësimit të një numri zyrtarësh të Departamentit të Drejtësisë, të cilët patën luajtur një rol domethënës në procesin hetimor ndaj Presidentit Trump”, thuhet në një deklaratë të qarkulluar nga një zyrtar i Departamentit të Drejtësisë. “Për shkak të veprimtarisë së tyre, prokurori i përgjithshëm në detyrë nuk beson se këta zyrtarë do të veprojnë për të zbatuar me besnikëri axhendën e presidentit. Kjo masë është në përputhje me misionin për t’i dhënë fund përdorimit politik të qeverisë”.

Nuk ishte menjëherë e qartë se cilët prokurorë do të prekeshin nga ky urdhër, apo se sa prej atyre që punuan me hetimet ndaj Presidentit Trump, do të vazhdonin në Departamentin e Drejtësisë. Nuk u mësua gjithashtu se sa prej prokurorëve të shkarkuar mund ta ankimonin masën me argumentin se departamenti nuk ka respektuar mbrojtjet për punonjësit e shërbimit civil në qeverinë federale.

Vetë prokurori i posaçëm Smith dha dorëheqjen nga Departamenti i Drejtësisë më herët këtë muaj, pasi paraqiti një raport voluminoz për dy dosjet hetimore ndaj zotit Trump, për përpjekjet për përmbysjen e rezultatit të zgjedhjeve të vitit 2020 dhe për mbajtjen e dokumenteve të klasifikuara në pronën e tij Mar-a-Lago, në Florida. Të paktën një prej anëtarëve kryesorë të ekipit të prokurorëve, Jay Bratt, gjithashtu dha dorëheqjen nga Departamenti i Drejtësisë këtë muaj, pasi shërbeu si prokurori kryesor për çështjen e dokumenteve të klasifikuara.

Shkarkimet u njoftuan fillimisht nga kanali televiziv Fox News./ VOA





Lajmet e fundit nga