Një klasike spektakolare, Tirana përmbys Vllazninë dhe fiton Superkupën e Shqipërisë

2022-12-07 21:07:00, Sport CNA

Një klasike spektakolare, Tirana përmbys Vllazninë dhe fiton

Një ndeshje spektakolare është zhvilluar në “Air Albania” mes Tiranës dhe Vllaznisë. Gola, përmbysje dhe shumë emocione ka dhuruar klasikja e Shqipërisë e vlefshme për Superkupën. Në fund festojnë bardheblutë, që fitojnë 3-2 falë një goli të shënuar nga Redon Xhixha në minutën e dytë shtesë. Të pafat shkodranët që zhbllokuan sfidën të parët me Malën.

Tirana përmbys gjithçka me supergolin e Patrick dhe golin e Hasanit. Latifi rikthehen sërish baraspeshën në minutat e fundit, por është Xhixha ai që vulos fatin e kësaj ndeshjeje spektakolare dhe i jep trofeun e parë sezonal skuadrës së Tiranës. Bardheblutë fitojnë Superkupën me rezultatin 3-2.

92’ GOOOOOOOL Tirana kalon sërish në avantazh me Xhixhën, që shfrytëzon një pasiguri të Zogovic dhe shënon golin e tretë për bardheblutë. Shehi kishte vendosur të zëvendësonte sulmuesin, por Xhixha arriti që të lërë shenjën e tij edhe në këtë sfidë

90’ Akordohen 6 minuta shtesë

90’ Të dyja skuadrat duan që të mbyllin ndeshjen pa shtesa. Patrick humbet një mundësi të mirë për të shënuar golin e tretë

89’ Tirana mundohet të reagojë me Hasanin, që tenton nga distanca, por gjuajtja e tij është e pasaktë

86’ GOOOOOOOOOL. Nga pika e bardhë godet Latifi, që dërgon topin në rrjetë dhe barazon shifrat në 2-2

84’ Penallti për Vllazninë. Çoba pengohet në zonë dhe për gjyqtarin Hamiti nuk ka dyshime: 11-metërsh për shkodranët

81’ Heriç dhe Çoba në fushë për Vllazninë, largohen Hoxhaj dhe Jonuzi. Josa hedh në fushë forca të reja sulmuese, pasi synon që të barazojë këtë sfidë

78’ Tjetër zëvendësim për Tiranën. Largohet Kallaku dhe vendin e tij në fushë e zë Hila

77’ Rrezikon Tirana me Patrick, por Zogovic është i vëmendshëm dhe grushton gjuajtjen e tij në këndore

74’ Tjetër rast i artë për Vllazninë. Latifi bën spektakël në krahë, kroson në zonë, por Hoxhaj bën më të vështirë dhe i vetëm në zonë nxjerr topin jashtë. Të pafat shkodranët

71’ Mundësi e artë për Vllazninë. Hoxhaj godet me kokë në zonë por topi përfundon ngjitur me shtyllën pingule

69’ Shehi hedh në fushë Limajn në vend të Deliut

68’ Josa bën dy zëvendësime. Hedh në fushë Latifin dhe Aralicën, që zënë vendin e Markut dhe Alivodës

65’ Janë hapur skuadrat dhe ka më shumë hapësirë për të dyja skuadrat, që mundohen të gjejnë golin.

63’ Provon Marku nda distanca, por gjuajtja e tij devijohet në këndore

61’ Rinis ndeshja

58’ Është ndërprerë loja sepse ka flakadanë në fushë

57’ Ndizet loja. Tirana kundërpërgjigjet menjëherë me Patrick, por gjuajtja e tij ndalet nga Zogovic. Tregohet egoist braziliani, pasi mund të pasonte për Xhixhën, që ishte i vetëm në zonë

56’ Vllaznia përgjigjet me Alivodën, që godet në zonë, por Bekaj i mohon golin. Meritë në aksion ka edhe Hakaj që pasoi për mesfushorin

53’ GOOOOOOOL Tirana kalon në avantazh me Hasanin. Bardheblutë përfitojnë nga një gabim i mbrojtjes shkodrane. Aleksi rikuperon një top, pason për Deliu, ky i fundit i jep një asist në zonë Hasanit, që shënon golin e përmbysjes

51’ Ka nisur me ritëm pjesa e dytë, si Tirana edhe Vllaznia kërkojnë të gjejnë golin e avantazhit

48’ Ndalet Loja sepse Hakaj ka mbetur i dëmtuar, karton i verdhë për Deliun

46’ Nis pjesa e dytë, skuadrat në kërkim të fitores

Mbyllet në barazim 1-1 një pjesë e parë e bukur mes Tiranës dhe Vllaznisë në “Air Albania”. Shkodranët kalojnë të parët në avantazh me Malën, ndërsa bardheblutë përgjigjen me një supergol të Patrick.

46’ Tirana i afrohet golit të avantazhit me Patrick, por gjuajtja e tij përfundon jashtë

45’ Akordohen 3 minuta shtesë

44’ Tirana përgjigjet me Aleksin, që tenton nga distanca, por gjuajtja e tij përfundon jashtë

42’ Mundësi e artë për Vllazninë. Shkodranët fitojnë një këndore. Shehi kërcen me kokë, grushton Bekaj, provon sërish lojtari i Vllaznisë, por topi përfundon jashtë

40’ Tirana ka marrë zemër nga goli i barazimit dhe mundohet që të shfrytëzojë këtë moment, që të shënojë golin e avantazhit

38’ GOOOOOOOL Barazon Tirana me Patrick. Bardheblutë fitojnë një goditje këndi. Braziliani realizon një super gol dhe kthen gjithçka në ekuilibër

35’ Minuta të mira për Vllazninë. Mala shkëputet në krahun e djathtë të sulmit, por ndalet në mënyrë të parregullt nga Najdovski, që merr kartonin e parë të sfidës. Kruja pason për Gurishtën në zonë, një skemë e Vllaznisë, por topi përfundon jashtë

34’ Vllaznia fiton një goditje dënimi, Kruja kroson në zonë, Mala tenton portën nga distanca, por gjuajtja e tij përfundon jashtë

32’ Është ndërprerë për disa çaste loja, pasi janë dëmtuar dy lojtarë në fushë

28’ Tirana fiton një goditje dënimi në kufijtë e zonës. Kallaku nis një gjuajtje-kros që ngjall panik në zonën kuqeblu, por përfundon mbi traversë

27’ Luhet kryesisht në mesfushë. Tirana mundohet të reagojë pas golit të pësuar, por Vllaznia nuk lëshon asnjë centimetër në mbrojtje dhe Zogovic ka qëndruar si spektator deri më tani

22’ Vllaznia fiton goditjen e parë nga këndi të ndeshjes. Por kuqeblutë nuk arrijnë që të rrezikojnë portën e Bekajt

21’ Tirana shfaqet e rrezikshme në të djathtë të sulmit, por lojtarët bardheblu janë të pasaktë në krosimin final dhe nuk arrijnë të rrezikojnë portën e Vllaznisë

19’ Bardheblutë fitojnë një goditje dënimi pranë zonës së Vllaznisë. Hasani tenton goditjen direkte në portë, por gjuajtja e tij është e gabuar dhe larg kuadratit

17’ Tirana ka shtuar presionin dhe ka mbyllur në gjysmëfushën e saj Vllazninë, por bardheblutë nuk po arrijnë të depërtojnë në prapavijën shkodrane, që mbron shumë mirë

12’ Tirana mundohet të reagojë, duke vertikalizuar në drejtim të Xhixhës dhe Patrick, por mbrojtja shkodrane është e kujdesshme dhe Zogovic nuk rrezikon në asnjë rast

9’ Tirana mundohet të reagojë me Xhixhën, por loja ndalet pasi sulmuesi është në pozicion jashtë loje

7’ GOOOOOOOOOL Vllaznia kalon në avantazh me Esat Malën. Në rastin e parë që i afrohen zonës së Tiranës, shkodranët ndëshkojnë bardheblutë me një gol shumë të bukur të Malës.

3’ Minuta të qeta në “Air Albania”. Tirana mundohet që të zhvendosë lojën në gjysmëfushën e Vllaznisë, por mungojnë rastet e rrezikshme në portat respektive

1’ Starton klasikja në “Air Albania”