Nëntë pikë të humbura, Takaj programon analizë të thelluar/ Presidenti i Skënderbeut do të vendosë “piketat”

2022-10-26 22:12:46, Sport CNA

Skënderbeu mbledh “pjesët”, Takaj përgatit mbledhje Skënderbeu u ndal nga Besëlidhja. Një barazim që nuk pritej, por deri të dielën nuk ishte fort dramatik. E megjithatë, situata u përmbys të hënën dhe fill pasi u zhvillua Dinamo-Flamurtari. Korçarët kanë humbur shansin që të bashkëkryesonin, pasi me një fitore sot do të ishin në pozita. Dhe është ky shkaku që bardhekuqtë po e “qajnë” ende atë rezultat.

Ajo që iku, iku. Tashmë e vetmja gjë që kanë në dorë korçarët është që të reagojnë. Kohë për të përgatitur ndeshjen e radhës kanë mjaftueshëm, pasi ajo me Apoloninë është shtyrë dhe ende nuk dihet axhenda e saktë. Alibia e dëmtimeve nuk është se i justifikon, ndaj autokritika mbetet e vetmja rrugë për të shpëtuar. Presidentit Ardjan Takaj duket se po i humb durimi dhe kërkon me çdo kusht që skuadra e tij duhet të punojë për atë që i ka vënë vetes si objektiv, diktimin e kampionatit. Burimet bëjnë me dije për “Panorama Sport”, se numri një i klubit korçar ka mbetur tejet i zhgënjyer jo vetëm nga barazimi i fundit, por mbi të gjitha me ecurinë e deritanishme të Skënderbeut të tij.

Edhe pse janë vetëm -2 nga vendi i parë, korçarët kanë shpërdoruar në këto shtatë javë kampionat plot 9 pikë dhe nuk janë pak për një ekip që kërkon rikthimin e shpejtë në elitë. Të njëjtat burime bënë me dije se ditën e enjte kur ekipi do të udhëtojë drejt Durrësit për t’u akomoduar në “Tropikal Resort”, do të ketë edhe një analizë të thelluar me numrin një të klubit. Presidenti do të japë mesazhin e fundit dhe shkundjen e radhës ekipit para se të nisë nga masat.

ANALIZA – Nga ana tjetër, në Korçë, trajneri Migen Memelli ka zhvilluar edhe analizën pas barazimit me Besëlidhjen. Përtej shqetësimeve dhe kritikave drejtuar ekipit, numri një i pankinës korçare është munduar të mbajë lart moralin e të tijve. Por duket se pas kësaj analize, shkundja e vërtetë do të vijë nga Takaj në Tropikal.

Kjo është pak, por e sigurt. Nga ana tjetër bardhekuqtë duket se kanë filluar të mbledhin pjesët e munguara që kishin në ndeshjen e fundit. Liço kthehet nga pezullimi, ndërsa pritet me shpresë për ndonjë rikuperim të tre të dëmtuarve, Zguro, Beci dhe Pecani, në të kundërt emergjenca do të jetë sërish prezente. Nga ana tjetër Rapa është ai që rrezikon të mungojë ndaj Flamurtarit në ndeshjen pasardhëse nëse ndëshkohet me karton në Fier.