web counter
LEXO PA REKLAMA!

SHKARKO APP

App Store
Google Play

Jo vetëm Adili, Partizani dhe një belg si zëvendësues të Bitrit

2023-01-20 10:39:00, Sport CNA

Jo vetëm Adili, Partizani dhe një belg si zëvendësues

Partizani kontakton Mevlan Adilin për të kompensuar largimin e Eneo Bitrit. Mësohet se qendërmbrojtësi nga Shkupi është rikthyer në planet e drejtuesve të kuq, të cilët janë kapur disi të papërgatitur nga situata me beratasin, pavarësisht se ky i fundit i kishte vënë në dijeni prej ditësh për negociatat që po bënte me çekët e Banik Ostravës, por edhe një skuadër gjermane.

Adili ka qenë opsion për Partizanin që në momentin kur prishi kontratën me klubin rus, SKA Khabarovsk. Fakti që trajneri Xhovani Kolela nuk beson shumë te polaku Jozef Menish, por duke shtuar këtu edhe dëmtimin e shkodranit Marcelino Preka, i cili do të jetë gati vetëm në muajin shkurt, klubi tashmë është i detyruar të afrojë patjetër një qendërmbrojtës cilësor, i cili duhet të jetë në nivelin e Bitrit dhe pse jo më cilësor se beratasi. Për momentin pista më e mundshme është ajo e Adilit, i cili u afirmua në kampionatin shqiptar pas dy sezoneve e gjysmë si pjesë e Vllaznisë. Në fakt, edhe klubi shkodran ka negociuar në javët e fundit për ta rikthyer, por palët kanë qenë larg akordit financiar. Në këto kushte, në lojë është futur fuqishëm klubi i kuq dhe drejtori sportiv, Elton Marini, po kërkon të bindë 28- vjeçarin.

Ndërkohë, gazeta zbulon se për të forcuar mbrojtjen pas largimit të Bitrit, opsion nuk është vetëm futbollisti nga Shkupi. Në orët e fundit mësohet se ka pasur negociata edhe me një klub të Superligës belge, që i ka ofruar Partizanit huazimin e një qendërmbrojtësi me shumë eksperiencë. Emri i tij mbahet sekret për efekt negociatash, por drejtuesit e kuq duken të dyzuar për këtë variant. Pritet që në orët e ardhshme klubi të vendosë për qendërmbrojtësin, teksa Adili shihet si më i favorizuari për të veshur fanellën e të kuqve, edhe për faktin se konsiderohet si lojtar shqiptar dhe nuk zë vendin e një të huaji në ekip.





Lajmet e fundit nga