Këshilli Mbikëqyrës i BSH

2025-12-15 07:19:19, Ekonomi CNA

Vendet vakante në Këshillin Mbikëqyrës të Bankës së Shqipërisë nuk do të plotësohen dot brenda këtij viti. Për shkak të nisjes me vonesë të procesit të përzgjedhjes së kandidatëve, ai nuk do të mund të finalizohet përpara përfundimit të mandateve të anëtarëve ekzistues, më datë 21 dhjetor.

Sipas burimeve nga Kuvendi, procesi i vlerësimit dhe votimit të kandidaturave që kanë aplikuar do të bëhet në fillim të vitit të ardhshëm.

Seanca e fundit e Kuvendit për këtë vit pritet të mbahet më datë 18 dhjetor. Koha nuk mundëson shqyrtimin dhe përzgjedhjen e kandidatëve brenda këtij afati.

Anëtarët e Këshillit Mbikëqyrës nuk mund të vazhdojnë të ushtrojnë funksionet e tyre pas përfundimit të mandatit. Ndërkohë, ligji “Për Bankën e Shqipërisë” kërkon që mbledhja e Këshillit Mbikëqyrës të zhvillohet me praninë e më shumë se gjysmës së anëtarëve të emëruar, duke përfshirë praninë e kryetarit ose zëvendëskryetarit të Këshillit Mbikëqyrës.

Kjo nënkupton që, në situatën aktuale, Këshilli Mbikëqyrës i Bankës së Shqipërisë nuk do të ketë më kuorum për të marrë vendime.

Kjo nuk është hera e parë që procesi i plotësimit të vendeve bosh në institucionet e pavarura bëhet me vonesë. Këshilli Mbikëqyrës i Bankës së Shqipërisë u përball me një situatë të tillë pikërisht në vitin 2018, para zgjedhjes së anëtarëve që së afërmi u përfundon mandati. Edhe në atë rast, numri i mandateve të përfunduara ishte gjashtë. Mosplotësimi në kohë i vendeve vakante e bllokoi për një kohë të shkurtër vendimmarrjen në Këshillin Mbikëqyrës.

Në muajin dhjetor 2025 përfundojnë mandatet shtatëvjeçare të gjashtë anëtarëve të Këshillit Mbikëqyrës, të zgjedhur në fund të vitit 2018. Pranë përfundimit të mandatit janë zëvendësguvernatorja e Parë, Luljeta Minxhozi dhe anëtarët jo ekzekutivë të Këshillit, Artan Hoxha, Violeta Staka (zgjedhur në 2020, për të përfunduar mandatin e ish-anëtarit, Arben Malaj), Edlira Luçi, Ridvan Bode, Suela Popa.

Luljeta Minxhozi, Artan Hoxha dhe Violeta Staka janë kandidatë të propozuar nga Kuvendi i Shqipërisë, ndërsa Edlira Luçi, Ridvan Bode dhe Suela Popa janë kandidatë të propozuar nga Këshilli i Ministrave. Rrjedhimisht, Kryeministria dhe Kuvendi duhet të kryejnë edhe procedurat për përzgjedhjen dhe propozimin e anëtarëve të rinj.

Kuvendi i shpalli vakancat vetëm më datë 20 nëntor, ndërsa aplikimet u mbyllën në 9 dhjetor. Ndërsa, Këshilli i Ministrave i shpalli zyrtarisht vendet vakante në 26 nëntor dhe afati për paraqitjen e kandidaturave është data 26 dhjetor.

Parashikohet që Kuvendi i Shqipërisë t’i shqyrtojë të gjithë kandidaturat për në Këshillin Mbikëqyrës të Bankës së Shqipërisë të gjitha së bashku, pasi Këshilli i Ministrave të ketë paraqitur zyrtarisht propozimet e saj për vendet vakante. Kjo pritet të ndodhë vetëm pas muajit janar të vitit të ardhshëm.

Sipas ligjit “Për Bankën e Shqipërisë”, të gjithë anëtarët e Këshillit Mbikëqyrës zgjidhen dhe emërohen nga Kuvendi i Republikës së Shqipërisë. Pesë prej anëtarëve propozohen nga Kuvendi, tre anëtarë propozohen nga Këshilli i Ministrave dhe një anëtar propozohet nga vetë Këshilli Mbikëqyrës.

Ligji parashikon që kandidatët për anëtarë të Këshillit Mbikëqyrës duhet të jenë persona që gëzojnë ndershmërinë dhe pastërtinë morale, si dhe që kanë arsimin e lartë ekonomik ose juridik; përvojë profesionale në çështje financiare dhe bankare; kualifikime profesionale të profilit; përvojë pune mbi pesë vjet në administratën publike ose në institucionet financiare dhe bankare.

Sipas ligjit, funksioni i anëtarit të Këshillit Mbikëqyrës është i papajtueshëm me funksionin e punonjësit, administratorit dhe aksionarit, me pjesëmarrje ndikuese në bankën e nivelit të dytë ose në subjektet që licencohen nga Banka e Shqipërisë.

Në procedurën e hapur nga Kuvendi i Shqipërisë janë paraqitur gjithsej 19 kandidatura: Artan Hoxha, Luljeta Minxhozi, Violeta Staka, Elton Korbi, Selami Xhepa, Pajtim Melani, Matilda Shehu, Saimir Muçmata, Eriona Bejleri, Fatmira Kola, Eni Xheko, Holta Zaçaj, Frosela Filo, Merita Bejtja, Arben Zibri, Ingrid Konomi, Adela Karapici, Emis Çerava dhe Liljana Mamadhaj. /Monitor