Në vitin 2026, agroindustria pret rritje të kostove dhe rënie konsumi

11 Janar 2026, 09:12, Ekonomi CNA

Në vitin 2026, agroindustria pret rritje të kostove dhe rënie

Disa nga prodhuesit e produkteve vendase parashikojnë se 2026 mund të sjellë rritje kostosh për ta, për shkak të rritjes së pagës minimale, rritjes të kostos për fuqinë punëtore, ndryshimet e mundshme të çmimeve të lëndëve të para, për sektorë që furnizohen nga tregjet e huaja.

Kurse prodhuesit vendas të birrës parashikojnë se për 2026 do të jenë në presionin e rritjes së kostos, për shkak të koniunkturave të tregjeve të huaja, prej nga furnizohen me lëndë të parë.

Faktori kryesor varet nga zhvillimet e luftës në Ukrainë (vazhdimi i luftës, arritja e paqes, përfshirja e vendeve europiane në konflikt, kostot e energjisë, etj.).

Për sa i përket kërkesës për mallra, prodhuesit e produkteve të bulmetit nuk presin rritje në vitin 2026, pasi nuk kanë pritshmëri për shtim të turistëve të huaj. Kërkesa për mallra bulmeti pritet të jetë njësoj si në 2025.

Rënie në konsum në vitin 2026 pritet edhe për prodhuesit e birrës vendase.

Konsumi i birrës në vendin tonë është mesatarisht 35–40 litra për frymë në vit, ndërsa tregu i BE-së është përafërsisht 70 litra për frymë në vit. Tendenca e rritjes është gjatë muajve të verës, e ndikuar nga turizmi, periudhë e cila favorizon birrën vendase.

Edhe sektori i turizmit nuk po arrin të mbajë levën mbështetëse për prodhimin vendas. Nuk presim gjë nga turizmi.

Edhe për vitin 2026, turizmi do të vijojë të ketë të njëjtën ecuri si në vitin 2025. Ky është niveli i turizmit që mund të arrihet në Shqipëri, pasi nuk ka politika për zhvillimin e strukturave turistike, edhe pse ndaj tyre aplikohet TVSH-ja e reduktuar në 6%”.

Për shkak të rënies së Euros, prodhuesit vendas humbasin në eksport 4 deri në 5% nga të ardhurat e tyre të plota, që mund të jetë 50% i marzhit të fitimit. Kjo vështirëson rritjen e investimeve, sidomos për bizneset e vogla dhe të mesme, të cilat nuk e gjejnë veten në këtë situatë dhe ndihen të pasigurta për kreditimin.

Edhe garancia sovrane, që mundëson kredi të buta me deri në 2% interes, nuk po i tërheq. Bizneset nuk janë optimiste për marrjen e saj, pasi nuk shohin perspektivën e rritjes së aktivitetit.

Problem tjetër mbetet rritja e kostos së fuqisë punëtore, për shkak të mungesës së saj. Edhe çështjet e sigurisë së mallrave janë problematike nga mungesa e ligjeve të sigurisë ushqimore në vend. Kjo ka krijuar një situatë të vështirë për eksportin e mallrave vendase edhe në vendet e rajonit.

Për të gjitha këto arsye, pritet që për vitin 2026, investimet në sektorin agroushqimor të jenë në stanjacion. Bizneset do të hezitojnë për të kryer investime, të cilat do të presin vitin 2027 për hapjen e fondeve të IPARD.

Bizneset janë të paqarta edhe për arritjen e standardeve përmes investimeve para anëtarësimit të vendit në BE. Pra, bizneset nuk janë të qarta se me çfarë fondesh do të financohen këto rritje: do të jenë me fondet e BE-së apo nëpërmjet kreditimit./ Monitor