E fundit!

11:47 Aktualitet

Video/ Bllokohet lëvizja në sheshin "Skënderbej", qytetarët të revoltuar, debatojnë me efektivët

Ditën e sotme në sheshin “Skënderbej” është zhvilluar fest...

Konventa e re tatimore ndalon zhvendosjen e fitimeve drejt vendeve me tatim më të ulët se 9%

23 Shtator 2025, 20:19, Ekonomi CNA

Konventa e re tatimore ndalon zhvendosjen e fitimeve drejt vendeve me tatim

“Marrëveshja ndërkombëtare e re i jep Shqipërisë të drejtën të tatojë diferencën kur kompanitë përpiqen të transferojnë fitimet në juridiksione me tatim nën 9%, duke rritur transparencën dhe sigurinë për bizneset vendase.”

Ministri i Financave Z.Petrit Malaj, nënshkroi sot në Paris me Zëvendëssekretaren e Përgjithshme të Organizatës për Bashkëpunim dhe Zhvillim Ekonomik (OECD) znj. Fabrizia Lapecorella, “Konventën Shumëpalëshe për Lehtësimin e Zbatimit të Shtyllës së Dytë Subjekt i Rregullit Tatimor” (STTR MLI), sipas njoftimit zyrtar.

Nënshkrimi i kësaj Konvente është pjesë e masave, në kuadër të projektit ndërkombëtar BEPS, pjesë e të cilës Shqipëria është që prej vitit 2019.

STTR është një pjesë integrale e konsensusit të arritur nga Kuadri Gjithëpërfshirës i Projektit Ndërkombëtar BEPS, për Shtyllën e Dytë të zgjidhjeve (Pillar 2) mbi rregullat globale kundër erozionit të bazës tatimore, që synojnë të adresojnë sfidat tatimore që rrjedhin nga digjitalizimi i ekonomisë.

Gjatë fjalës së tij, Ministri i Financave u shpreh se Shqipëria do të mund të përmbushë me efikasitet më të lartë angazhimet e saj, duke qenë se qëllimi kryesor i Konventës është të ndihmojë në rritjen e transparencën dhe integritetit të sistemit ndërkombëtar të tatimeve.

Ministria e Financavedo të vijojë të jetë e anagazhuar për të nxitur drejtësinë tatimore, rritjen e të ardhurave, për të parandaluar zhvendosjen e fitimeve, si dhe për garantimin qëndrueshmërisë fiskale, në dobi të një klime më të mirë të të bërit biznes, përfundon njoftimi i financave.

Si rregullohet transferimi i fitimit

Rregulli i Tatimit Minimal të Shtyllës Dy (The Pillar Two Subject to Tax Rule/STTR) është një dispozitë e bazuar në traktat ndërkombëtar, që synon të garantojë një nivel minimal tatimi për pagesat ndërkufitare brenda grupeve shumëkombëshe.

Ky rregull aplikohet për një grup të caktuar pagesash, si interesa, tarifa shërbimesh, honorare ose pagesa të tjera ndërmjet degëve dhe filialeve të të njëjtit grup, kur këto kryhen nga një vend drejt një vendi tjetër.

Nëse pagesat që shkojnë te përfituesi në vendin e rezidencës tatohen me një normë më të ulët se 9% tatim mbi fitimin, atëherë vendi i burimit – pra vendi nga ku kryhet pagesa, fiton të drejtën të tatojë këto të ardhura deri në nivelin minimal prej 9%.

Kjo nënkupton se një kompani që operon në Shqipëri nuk do të mund t’i zhvendosë fitimet e saj drejt një filiali në një juridiksion tjetër ku tatimi mbi fitimin është më i ulët se 9%, me qëllim shmangien e detyrimeve tatimore. Përkundrazi, Shqipëria, si vend burimi i pagesës, do të ketë të drejtën të aplikojë diferencën e tatimit derisa të arrijë nivelin minimal.

Ky mekanizëm është pjesë e paketës globale të BEPS (Base Erosion and Profit Shifting), e cila synon të parandalojë praktikat e erozionit të bazës tatimore dhe zhvendosjes artificiale të fitimeve, duke siguruar më shumë drejtësi fiskale dhe konkurrencë të ndershme midis bizneseve.

Për bizneset, kjo krijon një terren më transparent dhe parashikueshmëri më të madhe, duke reduktuar avantazhet e padrejta që lindin nga shfrytëzimi i juridiksioneve me taksa shumë të ulëta./ Monitor