E fundit!

09:27 Kronika

E rëndë në Korçë, 66-vjeçari i jep fund jetës

Rreth orës 08:40, në lagjen nr. 10, Korçë, një automjet ti...

Video-Ngjarje epokale në Tiranë/ Zjarrfikësit shpëtojnë macen e ngecur në pemë

18 Shtator 2022, 09:41, Aktualitet Roland Qafoku

Video-Ngjarje epokale në Tiranë/ Zjarrfikësit shpëtojnë

Të premten në Tiranë ndodhi një ngjarje që nuk e teproj të them se ka fuqinë e ndarjes epokale në Shqipëri.

Në një vend kur kafsha është keqtrajtuar rregullisht dhe është vrarë po aq rregullisht, ndodhi përmbysja.

Isha rastësisht dëshmitar i një veprimi që nëse nuk do ta filmoja pak do të besohej.

Një skuadrilje zjarrfikësish shpëtuan një mace që kishte ngecur në pemë.

Po, po, e lexuat mirë. Makina e zjarrfikëses me shkallaren 20 metra të gjatë, tre punonjës zjarrfikës që për 10 minuta u morën me të, arritën të kapnin macen dhe ta ulnin në tokë.

Në një rrugicë përballë ish-hotel “Diplomat 1”, një zonjë kishte marrë në telefon e alarmuar numrin 193. “Alo, zjarrfikësja? Më ka ngecur macja në pemë. Kërkoj ndihmën tuaj!”.

Sigurisht që kjo kërkesë, në traditën e shoqërisë sonë futet në telefonatat e çmendura dhe të bezdisshme.

Ankesa më e zakonshme në këtë vendin tonë është: Zjarrfikësja erdhi me vonesë, prandaj ndodhi fatkeqësia. Por, jo. E morën me shumë seriozitet zjarrfikësit.

Ndezën makinën dhe sirenën dhe për pak minuta mbërritën në vendngjarje. Një ngjarje vërtetë e rrallë për t'u shkruar në librat e shërbimit dhe komunikatat e ditës.

Skena ishte pothuajse surreale. Një shkallare që ngjitej e ngjitej si ashensor dhe bashkë me të edhe një nga punonjësit me uniformë.

Macka që mjaulliste dukej që me gjuhën e saj kërkonte ndihmë. Vetëm në pak minuta macja u shkëput nga zjarrfikësi i parë, por jo nga i dyti.

Ra në duart e tij dhe shpëtoi mrekulliusht. “Heroi” mori bravon e kureshtarëve dhe timen gjithashtu me një filmim të papërgatitur.

M'u kujtuan sa e sa ngjarje që kam mbuluar si gazetar. Sa e sa operacione live të policisë me arrestime dhe përplasje me armë. Por, si kjo kurrë nuk më kishte ndodhur.

Vërtetë është një ngjarje e vockël fare, por që tregon kaq shumë. U shpëtua vërtetë një mackë, por pikërisht kjo është një ndarje epokale për ne shqiptarët.

Shoqëria jonë ka nisur të ndryshojë. Jo vetëm nuk i vret më kafshët si dikur, por i shpëton ato, edhe me shkallaren e zjarrfikësve.

Bravo zjarrfikësit e Tiranës! Është mbyllur një epokë dhe ka nisur një tjetër.