Tri dekada në polici/ Kush është drejtori i ri që pritet të marrë komandën për Tiranën

6 Qershor 2026, 11:31, Aktualitet CNA

Tri dekada në polici/ Kush është drejtori i ri që pritet

Adriatik Tafçiu, i renditur i pari në procesin e vlerësimit për drejtimin e drejtorive vendore të Policisë së Shtetit, me 86 pikë, pritet të marrë drejtimin e policisë së Tiranës.

Tafçiu numëron afro tri dekada eksperiencë në strukturat e policisë dhe në fushën e hetimit kriminal.

Tri dekada në polici/ Kush është drejtori i ri që pritet

Adriatik Tafçiu

Karriera e tij në Policinë e Shtetit nisi në vitin 1997 në Dibër, ku mbajti disa funksione të rëndësishme, nga inspektor i Policisë Kriminale deri në drejtimin e strukturave të specializuara kundër narkotikëve, antiterrorit dhe krimit të organizuar.

Gjatë viteve në vijim ai ka ushtruar detyra drejtuese në disa qarqe të vendit, përfshirë Dibrën, Kukësin, Lezhën, Beratin, Korçën dhe Gjirokastrën.

Në eksperiencën e tij profesionale spikasin pozicionet si zëvendësdrejtor i policisë në Kukës, Lezhë dhe Gjirokastër, shef komisariati në Berat, Skrapar dhe Kuçovë, si dhe drejtues i sektorëve kundër krimeve të rënda dhe akteve terroriste.

Përveç karrierës operative, Tafçiu ka kontribuuar edhe në fushën akademike. Ai ka shërbyer si pedagog dhe më pas lektor në Akademinë e Sigurisë, ku ka zhvilluar lëndë që lidhen me hetimin e krimit, procedurën penale, terrorizmin dhe krimin e organizuar. Aktualisht mban detyrën e përgjegjësit të Departamentit të Formimit të Vazhdueshëm në Fakultetin e Sigurisë dhe Hetimit.

Në aspektin arsimor, ai është diplomuar në Akademinë e Policisë me rezultate maksimale dhe më pas ka përfunduar studimet në drejtësi, duke marrë dy diploma Master Shkencor, në të Drejtën Civile dhe në të Drejtën Penale. Gjithashtu është i licencuar si avokat.

Gjatë karrierës së tij ka ndjekur dhjetëra trajnime profesionale të organizuara nga partnerë ndërkombëtarë dhe organizata të specializuara në fushën e sigurisë, hetimit kriminal dhe luftës kundër terrorizmit.

Tafçiu është gjithashtu autor i disa artikujve profesionalë dhe bashkautor në literaturën akademike për studentët e Akademisë së Sigurisë, me fokus krimin e organizuar, terrorizmin dhe procedurat e hetimit.

Me 86 pikë në procesin e fundit të vlerësimit, ai rezultoi kandidati më i vlerësuar nga komisioni i ngritur për përzgjedhjen e drejtuesve të rinj të policisë./ CNA