web counter
LEXO PA REKLAMA!

SHKARKO APP

App Store
Google Play

Shënohet Dita Kombëtare e Rinisë/ 33 vjet nga Lëvizja Studentore që solli demokracinë

8 Dhjetor 2023, 07:16, Aktualitet CNA
Shënohet Dita Kombëtare e Rinisë/ 33 vjet nga Lëvizja
Momenti i rrëzimit të bustit të Enver Hoxhës

Shënohet sot Dita Kombëtare e Rinisë. Me vendim të marrë nga Kuvendi i Shqipërisë nga viti 2009, kjo datë përkujtohet si festë kombëtare në nderim të të gjithë studentëve të dhjetorit 1990 dhe gjithë rinisë shqiptare.

Më 8 dhjetor 1990, një grup studentësh e pedagogësh të Universiteteve të Tiranës, u bënë iniciatorë e protagonistë të kthesës së madhe historike, protestave paqësore që sollën rënien e sistemit komunist dhe lindjen e demokracisë.

Të organizuar ata marshuan nga 'Qyteti Studenti' drejt qendrës së Tiranës. Me shprehjen “E duam Shqipërinë si gjithë Evropa”, të rinjtë kërkuan ngritjen e sistemit të vlerave perëndimore dhe të shtetit të së drejtës; integrimin në Evropë dhe garantimin e pluralizmit politik si bazë kryesore për një shoqëri të lirë e demokratike. 

Lëvizja Studentore e vitit 1990 është e vetmja Lëvizje paqësore që ndryshoi historinë e Shqipërisë.

Protestat do të vazhdonin edhe për dy ditët në vijim deri në datën 11 dhjetor në mbrëmje kur në takim me Ramiz Alinë u konfirmua edhe pluralizmi politik, të cilin e shpallën menjëherë pas kthimit nga ai takim, duke nisur edhe organizimet për themelimin e Partisë Demokratike.

Lëvizja Studentore do të vijonte me organizime e protesta edhe në ditët e para të vitit 1991 deri në ditët e grevës së urisë, kulmuar mesditën e 20 shkurtit 1991, kur studentët të mbështetur nga pedagogët dhe shumë qytetarë të Tiranës, zbarkuan në sheshin "Skënderbej", duke rrëzuar përfundimisht diktaturën komuniste dhe duke sjellë për shqiptarët lirinë e munguar gjatë pothuaj gjysmëshekulli.

Akti i tyre publik i dha fund epokës së gjatë të vetizolimit dhe të sundimit ideologjik, duke i hapur kështu rrugën e ekonomisë së tregut dhe shoqërisë së hapur.

Sot pritet të zhvillohen një sërë aktivitetesh në nderim të kësaj dite të rëndësishme për Shqipërinë dhe shqiptarët./ CNA





Lajmet e fundit nga