E fundit!

12:50 Aktualitet

GJKKO gjobit avokatin e pandehur të Erion Veliajt

GJKKO ka gjobitur avokatin e pandehur të kryebashkiakut të...

Skandali i Onkologjikut/ Alimehmeti, për CNA: Duhet reagim institucional, ligji i barabartë për të gjithë

28 Qershor 2024, 11:07, Aktualitet CNA

Skandali i Onkologjikut/ Alimehmeti, për CNA: Duhet reagim institucional,

Mjeku Ilir Alimehmeti, burimi: CNA

Skandali te spitali Onkologjik ka tronditur mbarë opinionin publik.

Mjeku Ilir Alimehmeti, në një intervistë për CNA TV, me gazetaren Fabjona Pasho, e ndan skandalin në 3 çështje.

"Ligji duhet të jetë i barabartë për të gjithë, nga i pari tek i fundit. Për çdo rast, ligji duhet zbatuar, nëse shkelet, do të marrë vendimet gjyqësori karshi tij. Shoh të paktën tri çështje brenda një lloj diskutimi dhe kush i sheh të tria në një ka arsyetimin e vet. Kemi disa pacientë, të cilët drejtohen nga sistemi publik drejt privatit, duke gjeneruar patjetër përfitime në sistemin privat. Kemi një çështje tjetër për mjekime për përdorim spitalor, që prokurohen për t’u përdorur në spitale, një pjesë e të cilave del nga spitali për t’u shitur në sistemin privat. Çështja e tretë për praninë e një aparature rrezatuese, që riskon njerëz të tjerë, përfshirë këtu vetë mjekët, pacientë, apo njerëz të tjerë që ndodhen aty afër, pa pasur kushtet e përshtatshme për t’u ruajtur nga ky lloj rrezatimi."

Një tjetër problematikë që Alimehmeti ngre është edhe centralizimi i kurimit vetëm në kryeqytet, që i detyron pacientët të shkojnë te shëndetësia dhe jo shëndetësia tek ata.

Spitali Onkologjik, foto e marrë nga Google

"Numri i konsultave kirurgjikale në spitalin Onkologjik është 70-75 në ditë. Plus rreth 49 të tjera që vijnë nga rrethet. Imagjinoni se çfarë shifre është kjo. Është bërë një sistem i centralizuar dhe të gjithë duhet të vijnë në Tiranë. Për shkak të një centralizimi, në duart e pak njerëzve vetëm në Tiranë, e mira e vetme do të kishte qenë monitorimi, por as kjo nuk ka ndodhur. E thotë KLSH-ja. Ne mendojmë se decentralizimi është rruga e duhur dhe ofrimi i shërbimeve më afër qytetarëve. Të shkojë shëndetësia te pacienti, jo pacienti te shëndetësia".

Sipas Alimehmetit, i gjithë problemi i takon sistemit, i cili nuk garanton kushtet e duhura, si për pacientët, ashtu edhe për mjekët, ndërsa i sugjeron ministrisë që të ngrejë një grup pune, pasi hetimi administrativ nuk është zgjidhja.

"Po nesër a do të përmirësohet trajtimi? Do të ketë medikamente? Pajisjet a do të funksionojnë nesër, nëse këto paskan qenë problemi? Do të ulet menjëherë vdekshmëria e kancerit, meqenëse paska qenë problemi në dy veta apo tre? Problemi është shumë më rrënjësor. Ne shpenzojmë 2.5% të PBB-së për buxhetin e shëndetësisë, më e ulëta në Evropë, edhe Kosova na e kalon.

Mjeku Ilir Alimehmeti, burimi: CNA

Sa barna mungojnë? Ndër 13 medikamente që KLSH ka kontrolluar, thonë se ka pasur vonesa në zhvillimin e tenderëve dhe furnizimin e medikamenteve nga 12 deri në 34 ditë, në kundërshtim me recetën mjekësore. Do të thotë se nuk zbatohet dot skema e terapisë. Po tenderët kush i bën, ata mjekët në fund fare? I bëjnë hallkat e fundit të zinxhirit, apo janë më lart këto gjëra? Nuk janë aty për të thënë nuk e dinim. Sepse është krijuar një lloj skeme, siç e përdori kryeministri "nuk e dija unë se ç'bënte ai". Të njëjtën skemë përdori Erion Veliaj me drejtorët e tij. Të njëjtën gjë po zbaton edhe tani kjo ministre. Ajo mund të shfaqej duke thënë "unë gjeta një situatë të tillë, do të ngre një grup pune dhe me këtë grup pune do të ecim para. Thotë do të bëjmë hetim administrativ. Çfarë do të thotë do të bëjmë hetim administrativ? Si do të merret trajtimi nga pacienti nesër? Kjo është pyetja që duan të dinë njerëzit. Këto janë fjalë boshe, nuk na çojnë askund. Le t’i bëjnë hetimet organet përkatëse, por detyra e ministrisë nuk është të bëjë hetime administrative. Detyra e Ministrisë së Shëndetësisë është të ofrojë shërbim shëndetësor."

Alimehmeti bën thirrje të zbatohen rekomandimet e Kontrollit të Lartë të Shtetit dhe Organizatës Botërore të Shëndetësisë, të cilat përmbajnë të dhëna alarmante për trajtimin e kancerit në Shqipëri./ CNA TV