web counter
LEXO PA REKLAMA!

SHKARKO APP

App Store
Google Play

Rriten nivelet e Drinit dhe Bunës, nisin shkarkimet e kontrolluara, probleme në disa akse

17 Shkurt 2026, 08:22, Aktualitet CNA
Rriten nivelet e Drinit dhe Bunës, nisin shkarkimet e kontrolluara,
Foto ilustruese

Reshjet intensive të 24 orëve të fundit dhe prurjet e shtuara në kaskadën e lumit Drin kanë sjellë rritje të niveleve të ujërave në qarkun e Shkodër. Prefektura ka bërë të ditur se situata po monitorohet në terren, ndërsa strukturat e emergjencës mbeten në gatishmëri.

Sipas njoftimit të Korporatës Elektroenergjetike Shqiptare (KESH), pas vlerësimit të situatës hidrologjike kanë nisur shkarkimet e kontrolluara nga hidrocentralet e kaskadës së Drinit: Hidrocentrali i Fierzës, Hidrocentrali i Komanit dhe Hidrocentrali i Vaut të Dejës.

Ujë në toka bujqësore në Obot

Që prej pasdites së djeshme është konstatuar rritje e niveleve të lumenjve Drin dhe Bunë, si dhe të Liqenit të Shkodrës. Në zonën e Obotit raportohet prezencë uji kryesisht në toka bujqësore, duke zgjeruar sipërfaqen e përmbytur, por pa rrezik për banesat deri në këto momente.

Aksi rrugor lidhës i fshatit me rrugën kryesore paraqet prezencë uji rreth 40–50 centimetra, çka ka vështirësuar lëvizjen e mjeteve të vogla.

Në terren ndodhen dy mjete me kalueshmëri të lartë dhe 10 efektivë të Forcat e Armatosura të Shqipërisë, të angazhuar për çdo nevojë emergjente.

Borë dhe orteqe në zonat malore

Ndërkohë, reshjet e borës kanë sjellë probleme në akset malore. Rruga Bogë–Theth vijon të ndikohet nga reshje intensive, ndërsa Qafa e Thorës mbetet e bllokuar në zonën e tuneleve për shkak të orteqeve. Po punohet me mjete borëpastruese për hapjen e rrugës.

Në aksin Hani i Hotit–Vermosh ka reshje të dendura dëbore mbi kuotën 1000 metra, ku qarkullimi kryhet vetëm me goma dimërore dhe me asistencë të mjeteve borëpastruese.

Nga bashkitë Malësi e Madhe, Vau i Dejës, Pukë dhe Fushë-Arrëz nuk raportohen problematika.

Autoritetet bëjnë apel për kujdes maksimal dhe ndjekje të udhëzimeve të strukturave të emergjencës, ndërsa situata vijon të monitorohet në mënyrë të vazhdueshme./ CNA





Lajmet e fundit nga