Raportimi i mediave greke për ngjarjet në Zvërnec/ Rama: Për herë të parë në 35 vjet Shqipëria synon Olimpin e turizmit

1 Qershor 2026, 15:56, Aktualitet CNA

Raportimi i mediave greke për ngjarjet në Zvërnec/ Rama: Për

Kryeministri Edi Rama ka bërë një reagim në rrjetet sociale lidhur me ngjarjet e ndodhura në Zvërnec dhe mënyrën se si po trajtohen nga mediat greke.

Rama shprehet në reagimin e tij se për herë të parë në 35 vite Shqipëria po synon majën e turizmit me një projekt që nuk është bërë kurrë më parë në Europë.

Ai ka ironizuar deklaratat e bëra në mediat greke lidhur me çështjen, ndërsa ka listuar benefitet për Shqipërinë nga zhvillimi i këtij projekti duke nisur nga vendet e punës deri te rritja e prodhimit të përgjithshëm kombëtar.

Postimi i plotë:

“35 VJET S’E KAM PARË KURRË KËTË MOBILIZIM”

Eh vëllai im, po normal, sepse për herë të parë në 35 vite Shqipëria po synon Olimpin e turizmit me një projekt marramendës, që nuk e ka askush në këtë anë të botës.

E tani që projektit po i afrohet dita e daljes në dritë, dolën shqiponjat të mbrojnë atdheun nga 4 miliardë Eurot investim të partnerëve amerikanë e katariotë.

Dhe për herë të parë në 35 vjet, mediat greke dhe faqet me miliona ndjekës në Greqi, janë bërë njësh me shqiponjat për të shpëtuar atdheun tonë nga ardhja e hoteleve më prestigjiozë të botës, nga 10 mijë vende pune cilësore, nga rritja e prodhimit të përgjithshëm kombëtar me 4% deri në 2030, rritja e të ardhurave për frymë, rritja e pagave e pensioneve (si në Malin e Zi për shembull, largqoftë), nga rritja e vlerës së pronës së çdo vlonjati e jo vetëm, nga zgjerimi i zinxhirit të vlerës për bujqit, peshkatarët, shoferët e me radhë të gjithë subjektet e lidhura me atë zinxhir, nga personazhet botërore të artit, sportit, modës, biznesit, që mos e dhëntë Zoti do vinin e do flinin, disa edhe do blinin edhe shtëpi në Vlorë…

Po mirë këto, po pse pak është shpëtimi i Shqipërisë nga rritja e mëtejshme e imazhit ndërkombëtar, i cili edhe kaq edhe u teprua shumë, sepse në sytë e botës Shqipëria duhet të jetë mafie, korrupsion, llum

Prandaj të gjithë shqiponjat në protestë sot, se mbulimin nga media greke e keni të garantuar, dy zogj me një gur dmth. /CNA