Policia e Korçës, në gatishmëri për natën e ndërrimit të viteve/ Masa përforcuese

27 Dhjetor 2023, 11:16, Aktualitet CNA

Policia e Korçës, në gatishmëri për natën e

Shefi i Sektorit të Policisë Rrugore, Kreshnik Skëndo

Shefi i Sektorit të Policisë Rrugore, Kreshnik Skëndo, në një prononcim për mediat u shpreh se janë marrë të gjitha masat për të siguruar një trafik normal dhe për t'ua bërë përdoruesve sa më të lehtë festën e ndërrimit të viteve.

Skëndo nënvizoi se Policia e Shtetit dhe Policia Rrugore si pjesë përbërëse e saj ka kaluar në gatishmëri të përforcuar.

"Ju falënderoj për mundësinë që nëpërmjet jush të komunikoj me përdoruesit e rrugës. Sektori i Policisë Rrugore i qarkut të Korçës në këtë fundvit ka marrë të gjitha masat për të siguruar një trafik normal dhe për t'ua bëjë përdoruesve sa më të lehtë festën e ndërrimit të viteve. Policia e Shtetit dhe Policia Rrugore si pjesë përbërëse e saj ka kaluar në gatishmëri të përforcuar, për të përballuar fluksin në rritje që është në të gjithë territorin e Republikës së Shqipërisë, por në veçanti qytetit të Korçës që është një atraksion i rëndësishëm turistik. Siç dihet në këtë periudhë është qyteti më i frekuentuar nga pushuesit kryesisht vendas. Policia Rrugore me këtë rast u bën apel të gjithë përdoruesve të rrugës drejtuesve të mjeteve, por sidomos këmbësorëve, drejtuesve të biçikletave dhe motoçikletave që të tregojnë kujdes maksimal. Policia Rrugore nuk do të ketë si qëllim ndëshkimin e këtyre drejtuesve të mjeteve, por sigurisht që nuk do të tolerojë shkelje të cilat sjellin pasoja në trafik dhe në jetën e njerëzve. U bëj thirrje sidomos këmbësorëve të tregojnë kujdes maksimal dhe u bëj thirrje drejtuesve të na mirëkuptojnë pasi siç thashë trafiku është i shtuar dhe i kemi marrë të gjitha masat për t'ua lehtësuar këtë trafik. Policia rrugore do të jetë e pranishme në të gjitha akset edhe në qytet do të punojë me orë në të zgjatura, pasi ka kaluar në gatishmëri dhe do të merren masa për mjetet që do të tejkalojnë shpejtësinë", u shpreh Skëndo.

Skëndo nënvizoi se nuk do të tolerohen në asnjë moment shoferët që përdorin alkool në këto ditë festash.

"Në veçanti dihet që gjatë festave njerëzit kanë tendencën për të përdorur alkoolin më tepër dhe ndaj këtyre shkelësve nuk do të tregojmë tolerim sepse është e rëndësishme për ne dhe për jetën e tyre. Përforcime nga Tirana nuk kemi konfirmim, dihet që Tirana është vetë një qytet i madh dhe me probleme, por ne do ta përballojmë me këto kapacitete që jemi duke punuar me orë të zgjatura për të siguruar një kalim të mirë të ndërrimit të viteve", u shpreh Skëndo./CNA