PD dhe PS bashkojnë votat/ Miratohet projektvendimi për rregulloren e re të Kuvendit

21 Maj 2026, 21:57, Aktualitet CNA

PD dhe PS bashkojnë votat/ Miratohet projektvendimi për rregulloren e

Kuvendi ka miratuar në seancën e sotme plenare projektvendimin “Për disa shtesa dhe ndryshime në vendimin nr. 166, datë 16.12.2004, “Rregullorja e Kuvendit të Republikës së Shqipërisë”, i ndryshuar”.

Projektvendimi është miratuar me 100 vota pro, 0 abstenim dhe 1 kundër. Deputeti i Lëvizja Bashkë, Redi Muça ishte i vetmi ligjvënës që ka votuar kundër ndryshimeve të reja në rregulloren e Kuvendit, ndërkohë deputetët e PD-së dhe PS-së votuan pro.

PD dhe PS bashkojnë votat/ Miratohet projektvendimi për rregulloren e

Dakordësia për rregulloren e re, mes PD dhe PS u arrit në mbledhjen e sotme të Këshillit të Mandateve dhe Rregullores.

1. Pikat ku u tërhoq PS-ja:

a) PS u tërhoq nga propozimi që çdo projektligj i kërkuar nga BE të shqyrtohej brenda një jave me procedurë të përshpejtuar.

b) PS u tërhoq nga përgjysmimi i kohës së diskutimit në seancë plenare.

c) PS u tërhoq nga propozimi që institucionet kushtetuese të mos raportonin në seancë plenare, duke pranuar qëndrimin e PD-së se raportimi në Kuvend duhet të bëhet nga çdo institucion që ka detyrim kushtetues për raportim.

d) PS u tërhoq edhe nga propozimi që të gjitha institucionet të raportonin vetëm në Komisionin "Xhafaj", duke pranuar qëndrimin e PD-së, që raportimet vjetore të bëhen në komisionet përgjegjëse sipas fushës.

2. Pikat që u pranuan nga PD-ja:

a) U pranua propozimi i PD-së që forcon kontrollin parlamentar përmes ndërhyrjes së kryetarit të Kuvendit në rastet kur institucionet nuk u përgjigjen kërkesave të deputetëve për informacion. Sipas ndryshimit të pranuar:

– Kryetari i Kuvendit detyrohet t’i kërkojë institucionit përgjigje brenda 5 ditëve nga kalimi i afatit;

– në rast mosreagimi, i kërkohet titullarit të institucionit marrja e masave disiplinore deri në shkarkim.

b) U pranua propozimi i PD-së që kryetarët e komisioneve, kur kërkohet nga pakica parlamentare, të jenë të detyruar të thërrasin mbledhje komisioni ose seanca dëgjimore me titullarë institucionesh brenda dy ditëve nga paraqitja e kërkesës.

c) U pranua propozimi i PD-së që, me kërkesë të një kryetari grupi parlamentar, seanca plenare të ndërpritet në orën 22:00 dhe të rifillojë ditën pasardhëse.

d) U pranua propozimi që masat disiplinore të pezullohen automatikisht nëse ankimohen në Byronë e Kuvendit. Masat disiplinore nuk do llogariten më me ditë pune, por me ditë kalendarike. Sekretariati i Etikës me numër të barabartë anëtarësh. /CNA