E fundit!

12:20 Aktualitet

EKSKLUZIVE/ Ja kandidatët për postin e nëndrejtorit në Policinë e Shtetit

CNA ka zbuluar ekskluzivisht se cilët do të jenë kandidatë...

PD denoncon: Qeveria po ndryshon ligjet për të lejuar ndërtimet në Zonat e Mbrojtura

25 Nëntor 2023, 11:40, Aktualitet CNA

PD denoncon: Qeveria po ndryshon ligjet për të lejuar ndërtimet

Syri i Kaltër zonë e mbrojtur

Qeveria bashkë me kalimin e buxhetit në mënyrë të jashtëligjshme ka planifikuar të ndryshojë edhe legjislacionin duke i hapur rrugë ndërtimit të resorteve brenda zonave të mbrojtura. Është ky denoncimi që vjen nga deputetja demokrate Ina Zhupa.

“12 deputetë të Partisë Socialiste kërkojnë ndryshimin e ligjit ‘Për zonat e mbrojtura’, me qëllim hapjen rrugë të investimeve në ato territore, aktualisht të ndaluara. Përmes një projektligji të depozituar në Kuvend me datë 20 nëntor, duhen të kthejnë zonat e mbrojtura, në zona të pambrojtura, sipas preferencave të pushtetit.” – tha Zhupa.

Sipas Zhupës ligji aktual e ndalon çdo lloj ndërtimi dhe veprimtarie ekonomike për shkak të dëmeve të pakthyeshme që sjellin në mjedis dhe rëndësisë që ka flora dhe fauna në këto zona.

“Ky synim t’i hapet rrugë investimeve brenda zonave të mbrojtura, ka nisur me dy VKM të janarit 2022, ku qeveria hoqi mijëra hektarë nga zonat e mbrojtura, duke i reduktuar ato me 20% të sipërfaqes që kishin. Tashmë kjo çështje është në gjykatë, teksa organizatat e ndryshme kanë argumentuar se ‘vendimet synojnë të ligjërojnë shkatërrimin e zonave të mbrojtura bregdetare dhe ligatinore të Shqipërisë, duke prekur Liqenin e Shkodrës, ekosistemin Bunë-Velipojë, ligatinat Kune-Vain, Tale dhe Patok, Parqet Kombëtare të Divjakë-Karavastasë dhe të Butrintit, si dhe zonat Vjosë-Nartë e Pishë-Poro’. Por qeveria nuk ndalet as të pres vendimin e gjykatës, por vazhdon me plane shkatërrimtare,” – tha Zhupa.

Ky ndryshim ligjor nuk është gjë tjetër veçse garantimi i mbrojtjes ligjore për ndërtimet e paligjshme që janë bërë deri tani në sytë e qeverisë në zonat e mbrojtura.

Sipas denoncimit të demokratëve ky projektligj është hapi i fundit që zona si Syri i Kaltër të përdoren për tubacione ujore për vendet fqinje, që zona si Vjosa-Narta të legjitimohen për ndërtime dhe infrastrukturë, që zonat si Butrinti, Velipoja dhe Shkodra të mbushen me resorte me emrin ‘investime strategjike’ dhe ky është përfundimisht shkatërrimi i këtyre zonave.

Zhupa iu ka bërë thirrje deputetëve socialist që të tërhiqen nga kjo nismë dhe të mos bëhen vegla të premtimeve të Ramës./CNA