E fundit!

12:20 Aktualitet

EKSKLUZIVE/ Ja kandidatët për postin e nëndrejtorit në Policinë e Shtetit

CNA ka zbuluar ekskluzivisht se cilët do të jenë kandidatë...

Mbi “tradhtinë e madhe” në negociatat PS-PD!

13 Mars 2024, 14:57, Aktualitet CNA

Mbi “tradhtinë e madhe” në negociatat PS-PD!

Gazment Bardhi

Gazetari Mentor Kikia ka komentuar zhvillimet e fundit në politikë, ku në fokus për momentin janë bisedimet PS-PD.

Përtej ironisë, Kikia thekson se ulja në tryezë e opozitës dhe mazhorancës është gjëja më normale në demokraci, por në Shqipëri të ulesh me kundërshtarin konsiderohet si sakrificë e madhe.

Komenti i Mentor Kikisë

Mbi “tradhëtinë e madhe” në negociatat PS-PD!

Një ngjarje e madhe ka ndodhur në Shqipëri. Opozita dhe Maxhoranca janë ulur në një tryezë për të biseduar. Thuhet se aktorë ndërkombëtarë u angazhuan për këtë arritje të madhe. Të gjitha ambasadat kanë përshëndetur ngjarjen. Nuk dihet ende nëse kjo do të ketë impakt në konfliktet Rusi-Ukrainë dhe Izrael-Hamas.

Por, konspiracione të mëdha kanë plasur. Flitet për tradhëtira në të dy kampet. Për të shuar dyshimet dhe qetësuar turmat mosbesuese, palët kanë nxituar të qartësojnë situatën. Vetë kryeministri tha se kurrë nuk do të ketë bashkëpunim me “Non gratën”, pra me Berishën. Ndërsa nga ana tjetër Gazmend Bardhi siguroi se “kurrë nuk do të ketë marrëveshje me Ramën”.

Emisionet televizive zjejnë prej tri netësh. Populli edhe më shumë. Kudo disktuohet: Kush fitoi, e kush humbi? Kush ia futi njëri-tjetrit? Kush lëpiu atë që kishte pështyrë? Situata vazhdon të jetë e mjegullt ende.

Tani, përtej ironisë….

Që opozita dhe maxhoranca të ulen të bisedojnë, kjo duhet të jetë gjëja më e zakonshme në një demokraci. Në çdo vend ato kanë përplasje, zihen(edhe fizikisht madje). Por ulen e diskutojnë, nuk bien dakord, bërtasin, kritikojnë. Dhe sërish ulen e flasin. Sepse kjo është puna që ata kanë. Ata nuk prodhojnë as fruta, as qumësht, as këpucë, as tulla. Ata paguhen që të bëjnë politikë. Dhe politikë është që të flasësh edhe me “hasmin”.

Por, në këtë vend, ku palët e shikojnë njëra-tjetrën jo si kundërshtarë politikë por si armiq, ulja në një tryezë diskutimi konsiderohet sakrificë e madhe, quhet edhe tradhëti. Sepse ne jemi mësuar ti shikojmë vetëm në llogore lufte./ CNA