Kur do të vihet në punë hekurudha Tiranë-Durrës?/ Karakaçi jep detaje

22 Maj 2026, 12:59, Aktualitet CNA

Kur do të vihet në punë hekurudha Tiranë-Durrës?/

Ministri i Infrastrakturës dhe Energjisë, Enea Karakaçi, në konferencën e sotme me gazetarët është pyetur për afatin e vënies në punë të hekurudhës Tiranë-Durrës.

Karakaçi nuk dha një afat përfundimtar, por shtoi se në vitin 2027, mund të kemi vijën e parë hekurudhore funksionale në Shqipëri.

“Për sa i përket vënies në punë të hekurudhës Tiranë-Durrës, vepra për bërjen e shinave kryesore është përfunduar. Ai është një projekt në ndërtim dhe zhvillim. Patjetër ka pasur vonesa përkatëse sepse projekti i hekurudhës, kur është marrë kredia e parë, ka qenë i paplotë, nuk ka qenë në fazën e elektrifikimit dhe nuk kishte stacionet përkatëse, të cilat tashmë janë ezauruar. Ne kemi edhe procedurë prokurimi sa i përket elektrifikimit, që është faza përmbyllëse e kësaj procedure hekurudhore.

Elementi i rëndësishëm është se Hekurudha Shqiptare e ka maturuar projektin me Bankën Europiane për Rindërtim dhe Zhvillim dhe ka vendosur, sepse pika shqetësuese e hekurudhës ishte në Kashar, dhe tashmë Hekurudha Shqiptare ka filluar procedurat e rikthimit për të përmbyllur edhe katër kilometrat e fundit të hekurudhës Tiranë-Durrës, në pikën ku ka qenë gjithmonë stacioni i trenit në Tiranë. Edhe kjo procedurë është nisur dhe është publikuar. Vlerësoj që në vitin 2027 është i realizueshëm, vija e parë hekurudhore funksionale në Shqipëri”, tha Karakaçi.

Ministri foli më tej edhe për ndërtimin e rrugës Milot-Balldre, ku tha se ky projekt nuk ka ecur me ritmin e duhur, por shtoi se në fund të majit ose fillim të qershorit do të shpallet dhe oferta fituese për ndërtimin e saj.

"Dua të ritheksoj miratimin e marrëveshjes për financimin e projektiti 'Porta e Alpeve'. Qeveria ka projekte të rëndësishme për qarkun e Shkodrës. Është një masë investimi që nuk e ka pasur asnjë qark tjetër. Kjo nënkupton angazhimin për veriun e Shqipërisë. Problematikë që ngrenë qytetarët e qarkut të Lezhës dhe Shkodrës është rruga Milot-Balldren. Kjo rrugë ka kaluar në disa etapa jo të suksesshme. Ka qenë vullnet i qeverisë për ta shndërruar në një autostradë të klasit A dhe për të shfryrë trafikun. Ky projekt nuk ka ecur me ritmin e duhur. Jemi në fazën e vlerësimit të ofertave dhe pritet që në fund të majit ose në fillim të qershorit do të shpallim fituesin për rrugën Milot-Balldren. Kjo rrugë do të bëhet, do të jetë e kategorisë A dhe do të ketë edhe rrugë alternative”, tha Karakaçi.

Ai foli më tej edhe për Porto Romanon ku tha se mbetet një nyje strategjike për lëvizjen e mallrave dhe për mbrojtjen, pasi është pjesë e Korridorit 8.

“Edhe gara e dytë për Porto Romanon nuk rezultoi e suksesshme. Edhe ofertuesi i dytë tha se e kishte të pamundur të sillte një ofertë të dytë për shkak të rritjes së kostove. Porto Romano është nyjë strategjike për lëvizjen e mallrave, por edhe për mbrojtjen, pasi ka interes nga NATO sepse është pjesë e Korridorit 8. Jemi në bisedime dhe do të përpiqemi t’i japim një zgjidhje dhe ta rivitalizojmë atë projekt sa më të shpejtë”, tha Karakaçi. /CNA