E fundit!

12:20 Aktualitet

EKSKLUZIVE/ Ja kandidatët për postin e nëndrejtorit në Policinë e Shtetit

CNA ka zbuluar ekskluzivisht se cilët do të jenë kandidatë...

Fluks në Qafë-Thanë/ Shqiptarë të Maqedonisë së Veriut zgjedhin të pushojnë në Shqipëri

6 Gusht 2024, 14:06, Aktualitet CNA

Shqiptarët e Maqedonisë së Veriut kanë zgjedhur të kalojnë pushimet në shtetin shqiptar, duke kaluar kufirin nga pika doganore e Qafë-Thanës.

Më tepër se 90 mijë shtetas kanë qarkulluar në hyrje e në dalje të kësaj dogane brenda një periudhe shtatëditore, referuar edhe shifrave zyrtare nga policia.

CNA ka raportuar situatën e fluksit të lartë të krijuar në këtë pikë kufitare, ndërsa ditën e sotme vijon e njëjta situatë me pritje disaminutëshe në doganë për të hyrë drejt Shqipërisë.

Nëpërmjet disa intervistave me qytetarë të ardhur nga Maqedonia e Veriut dhe shtete të tjera të Evropës, duket interesi i madh i pushuesve që kërkojnë të kalojnë disa ditë në jug të vendit tonë. Vlora dhe Saranda mbeten dy qytetet që preferohen nga vizitorët për shkak të bukurive dhe bregdetit fantastik që ofron jugu.

Shqiptarët e Maqedonisë së Veriut tregojnë se vijnë shpesh në Shqipëri për pushime, por ka edhe nga ata qytetarë që e zgjedhin për herë të parë për shkak të sugjerimeve të marra nga miqtë e tyre në Shqipëri.

"Po shkojmë vetëm për 1 ditë në Tiranë. Ne jetojmë në Zvicër dhe kësaj here është e para që kalojmë nga Qafë-Thana. Pushimet i kemi vendosur, mendojmë të shkojmë në Vlorë. Durrësi është më afër, por uji s'është aq i pastër, Vlora është më e bukur", u shpreh një turist.

"Ne jemi nga Tetova dhe jemi duke shkuar për në Ksamil. S'e kemi menduar që do kishte kaq shumë trafik, por mendoj se kalojmë shumë shpejt. Është hera e parë që shkoj në jug të Shqipërisë. Kam shumë miq andej prandaj e zgjodhëm", tha një tjetër.

Edhe shtetasit e huaj, të ardhur nga vende si Turqia, Zvicra e Franca, kanë zgjedhur Shqipërinë për të kaluar disa ditë pushime. Ata tregojnë se është hera e parë që vijnë në Shqipëri, ndërsa kanë dëshirë të qëndrojnë edhe pak më tepër se 5 ditë në jug të vendit.

“Ne po shëtisnim në të gjithë vendet e Ballkanit dhe Shqipëria ka qenë një vizitë gjatë rrugës. Shkuam në Greqi, Maqedoni të Veriut, erdhëm edhe në Shqipëri. Kemi shkuar gjithashtu në Mal të Zi dhe Serbi. Ne kemi ardhur për pushime nga Turqia. Nuk kemi pritur shumë gjatë këtu, vetëm disa minuta kam pritur. Është hera e parë që jam në Shqipëri", tha njëri prej tyre.

Fluksi i lartë i qytetarëve ka qenë gjatë orëve të paradites dhe gjatë mbrëmjes, sipas autoriteteve doganore në këtë pikë kufitare.

Mësohet se për të shmangur radhën dhe pritjet, autoritetet po punojnë me sportele të plota, ndërsa po punohet edhe me procedurë të përshpejtuar në raste fluksi tepër të lartë./CNA