E fundit!

12:20 Aktualitet

EKSKLUZIVE/ Ja kandidatët për postin e nëndrejtorit në Policinë e Shtetit

CNA ka zbuluar ekskluzivisht se cilët do të jenë kandidatë...

Fitër Bajrami/ Mesazhi i Bujar Spahiut: Sot më shumë se kurrë bota ka nevojë për drejtësi dhe mëshirë

20 Mars 2026, 06:31, Aktualitet CNA

Kreu i KMSH, Bujar Spahiu, ka përcjellë një mesazh urimi dhe reflektimi me rastin e festës së Fitër Bajramit, duke theksuar rëndësinë shpirtërore të muajit të Ramazanit dhe vlerat që ai përcjell.

Në fjalën e tij, Spahiu u shpreh se kjo ditë e bekuar i gjen besimtarët me zemra të mbushura me mirënjohje ndaj Zotit për mundësinë për të përjetuar muajin e shenjtë të Ramazanit. Ai theksoi se agjërimi nuk është vetëm ndalim nga ushqimi dhe pija, por një proces i thellë pastrimi shpirtëror dhe edukimi moral.

“Ramazani ishte një shkollë e madhe për zemrat tona, ku u përpoqëm të ruajmë gjuhën nga fjala e keqe dhe zemrën nga urrejtja”, u shpreh ai, duke nënvizuar rëndësinë e largimit nga çdo vepër e keqe.

Spahiu vuri në dukje se kjo festë është gjithashtu një thirrje për përgjegjësi dhe solidaritet, duke theksuar se besimtari më i mirë është ai që bën mirë për të tjerët dhe ndihmon ata në nevojë.

Ai nuk la pa përmendur edhe situatat e vështira në botë, veçanërisht në Lindjen e Mesme, ku shumë njerëz e presin Bajramin në kushte lufte. Në këtë kontekst, ai bëri thirrje për lutje dhe mbështetje për të gjithë ata që vuajnë.

Në fund, kreu i KMSH theksoi se Islami është fe e paqes, mëshirës dhe drejtësisë, duke apeluar që këto vlera të kultivohen në shoqëri. Ai vlerësoi gjithashtu harmoninë fetare në Shqipëri si një pasuri që duhet ruajtur dhe forcuar.

Mesazhi përmbyllet me një thirrje për falje dhe mirëkuptim mes njerëzve, duke e cilësuar këtë ditë si një moment reflektimi dhe afrimi me njëri-tjetrin.

“Në këtë mëngjes të bekuar zemrat tona janë të mbushura me mirënjohje dhe falënderim ndaj Allahut të Madhëruar që na mundësoi këtë muaj të shenjtë të Ramazanit.

Sot qëndrojmë para Zotit me shpresën se ai e ka pranuar agjërimin tonë dhe çdo vepër të mirë që kemi bërë gjatë këtij muaji të begatë.

Ramazani nuk ishte vetëm një ndalim nga ushqimi dhe dija por një shkollë e madhe për zemrat tona.

Gjatë këtij muaji u përpoqëm të ruajmë gjuhën nga fjala e keqe, zemrën nga urrejta. Agjërimi nuk është vetëm largim nga ushqimi por largim nga çdo vepër e keqe. Ramazani ishte një kohë sakrifice dhe përulësie.

Ramazani na mësoi se zemra e besimtarit bëhet më e fortë kur ndan me të tjerët dhe shtrin dorën për të ndihmuar ata që kanë nevojë.

Kjo festë është një thirrje për përgjegjësi. Islami na mëson se më i miri nga gjithë është ai që bën mirë për të tjerët.

Sot ndërsa ne festojmë nuk mund të mos mendojmë për botën rreth nesh. Në Lindjen e Mesme njerëzit e presin Bajramin mes luftës.

Në këtë ditë të bekuar lutjet tona shkojnë për ata që vuajnë.

Mesazhi fesë islame është i qartë. Islami është fe e paqes e mëshirës dhe drejtësisë.

Besimtari është thirrur të jetë burim paqe dhe drejtësi. Bota sot ka nevojë për më shumë drejtësi për paqe. Ne si shoqëri kemi përgjegjësinë të kultivojmë këto vlera në të gjitha kohërat dhe vendet. Shqipëria ka qenë një vend ku bersimet fetare kanë jetuar në harmoni dhe respekt të ndërsjelltë. Këtë pasuri duhet ta ruajmë gjithmonë. Të jetë kjo ditë reflektim për të gjithë. Të jemi të gatshëm për të falur njëri-tjetrin” ishte mesazhi që përcolli kreu i KMSH-së Bujar Spahiu./ CNA