Artan Hoxha tregon historinë e Gramoz Rexhepit/ Zhdukja e të riut që themeloi kartelin e parë shqiptar të narkotrafikut

8 Tetor 2022, 23:04, Aktualitet CNA

Artan Hoxha tregon historinë e Gramoz Rexhepit/ Zhdukja e të riut

Gazetari Artan Hoxha

Gazetari Artan Hoxha ka treguar historinë e një të riu nga Vlora, për të cilin thotë se sot nuk i dihet as varri.

Bëhet fjalë për Gramoz Rexhepin, djalin nga Vlora që ka qenë student në Fakultetin Juridik të Tiranës dhe që filloi trafikimin e kanabisin gjatë kohës që jetonte këtu.

Ai rrëfeu në emisionin “Vetting” lëvizjet dhe arratisjet nga burgjet nga Italia në Spanjë, Belgjikë dhe Ekuador.

Sipas tij, Ekuadori është vendi i fundit në të cilin është parë i riu, që nga mediat mediat ndërkombëtare është cilësuar si njeriu që themeloi Kartelin e parë shqiptar të narkotrafikut.

“Rasti më specifik, i cili tanimë është në mediat botërore që shoh shpesh është rasti i Gramoz Rexhepit. Gramoz Rexhepi është një i ri nga fshati i Vlorës. Ka ardhur në Tiranë për të kryer studimet në Fakultetin Juridik. Praktikisht kur është arrestuar për herë të parë pranë hotel Tiranës. I akuzuar bashkë me një person tjetër në zonën e Krujës. Ai ishte student i universitetit në fakultetin juridik. U arrestua, u arratis nga burgu, u shpall në kërkim, u dënua në mungesë, shkoi në Itali ishte po ashtu në kërkim nga Interpoli. Nuk kishte rrugë tjetër jetese. Filloj me trafikim nga këtu gjatë kohës që ishte me kanabisin. U lidh me trafikantët e kokainës, u arrestua në Itali për kokainë, u arratis nga burgu në Itali pastaj shkoi në Spanjë. Shkoi në Belgjikë, u kthye në Spanjë e arrestuan në Spanjë, e ekstraduan në Belgjikë, u arratis prapë nga burgu në Belgjikë. Ishte një nga njerëzit më të kërkuar në gjithë Europën dhe përfundoi në Amerikën Latine me një pasaportë mos gaboj të një personi tjetër.

Pasaporta ishte e rregullt si pasaportë, por identiteti ishte i falsifikuar. U kap në Ekuador në qershor të 2016 dhe na janë dashur 2 muaj që të verifikohej që personi i cili ishte kapur ishte pikërisht Gramoz Rexhepi, ai personi shumë i kërkuar në Europë. Janë të paktën 6 shtete që kërkojnë ekstradimin e tij nga Ekuadori. Pra në 2014 pasi ai e kishte bërë gjithë trajnimin e tij, njohjet pra pasi kishte shëtitur burg në burg dhe sigurisht në burg nuk ka takuar intelektualë, inxhinierë, profesorë por ka takuar ato ‘intelektualët e botës së krimit’ profesorët, inxhinierët, pra bosët e krimit. Ka krijuar lidhje që nuk i krijon dot për një ditë dhe kjo gjë ka vulosur jetën e tij dhe në Ekuador prapë u arrestua shkoi në burg me personazhet më të rëndësishme të Ekuadorit. Tashmë ka dal nga burgu edhe është zhdukur as në Ekuador nuk ka gjurmë të tij se ku ndodhet, por imagjinoni jeta e një të riu në një moshë fare të re, 18 vjeç, 19, 20 vjeç i cili vjen nga një fshat i Vlorës për të studiuar në fakultetin juridik dhe si ka përfunduar në personazhin të cilin mediat ndërkombëtare e cilësojnë si njeriun që themeloi kartelin e parë shqiptar të narkotrafikut”, tregoi Artan Hoxha./ B.A. – CNA.al