E fundit!

12:20 Aktualitet

EKSKLUZIVE/ Ja kandidatët për postin e nëndrejtorit në Policinë e Shtetit

CNA ka zbuluar ekskluzivisht se cilët do të jenë kandidatë...

Berisha tregon shkakun e krizës energjetike/ Papërgjegjshmëria e qeverisë

20 Prill 2022, 10:47, Politikë CNA

Ish-kryeministri Sali Berisha ka akuzuar qeverinë për keqmenaxhim dhe vjedhje të energjisë gjatë mbledhjes që është duke zhvilluar në këto momente me ekspertët e Partisë Demokratike.

Nga selia blu, Berisha deklaroi se borxhi i sipërmarrjeve ka kaluar një miliard euro, ndërsa pretendon se qeveria ka mbajtur qëndrim të papërgjegjshëm.

Sipas tij, shkak i krizës nuk është moti, as lufta, por plaçkitja, grabitja, vjedhja në sipërmarrjet e energjitikës.

“Energjia, ka qenë një problem që ka qenë kardinal, tani në hijen e luftës agresionin rus ndaj Ukrainës, ka marrë përmasa edh më të mëdha. Shqipëria është vendi i vetëm në Europë që ka tre-katërfishuar çmimin e energjisë për bizneset. Dhe premton të rrisë në mënyrë absurde çmimin e energjisë për konsumatorët. Shqipëria është vendi i vetëm në Europë që takson naftën mbi 1 euro, që prodhon 1 mln ton dhe që ka dy-tre çmimeve më të larta në Europë. Sigurisht Shqipëria nuk është një ishull, por pjesë e kontinentit.

Megjithatë, në rrafshin e energjisë dhe prodhimit të saj, Shqipëria është vendi që duhet të ndjente më pak se çdo vend tjetër ndikimin e mbi energjetikën e kontinentit të agresionit rus mbi Ukrainën. Kjo pasi energjia e saj në masën 96-98 % është tërësisht ujore. Jo vetëm që është ujore, por ajo prodhohet me kosto më të ulët se në çdo vend tjetër të kontinentit.

Së treti; prodhimi i energjisë në Shqipëri gjatë vitit 2021 është më i larti në rekord historik, rreth 8.9 mld kv/orë. Duke parasysh këto faktorë dhe në qoftë se do të analizonim qëndrimin në menaxhimin e rezervës ujore të Kaskadës, konstatoj se shkaku më themelor i krizës energjetike nuk është moti, as lufta, por plaçkitja, grabitja, vjedhja në këto sipërmarrje. Shqipëria, nuk besoj të ketë një vend tjetër që zbraz digat dhe shet energji me 42 euro në të njëjtën ditë kur në bursë ajo është 130 euro. Apo blen energji me 300 euro, në një kohë kur në bursë atë ditë është 150 euro. Pra kemi të bëjmë me një rritje çmimesh të diktuara tërësisht nga keqmenaxhimi dhe vjedhja.

Ai që shiti energji me 42 euro, ka ndarë para me blerësin. Sepse ky i fundit e ka shitur diku me çmimin e bursës. Pra kemi të bëjmë me një menaxhim kleptokratik të këtyre sipërmarrjeve publike, që de facto janë të falimentuara, pasi borxhi i tyre i ka kaluar 1 miliard euro.

Por çfarë qëndron tjetër në themel të kësaj krize? Në themel të saj qëndron qëndrimi i papërgjegjshëm i kësaj qeverie, e cila në 9 vite, nuk ka siguruar një burim të vetëm energjie, përveç burimeve ujore të kontraktuara më parë. Në një kohë kur potencialet ishin të jashtëzakonshme. Në një kohë kur kjo qeveri trashëgoi kontrata për ndërtimin e 432 hidrocentraleve në mbarë vendin. Përparësia e saj absolute duhej të ishte diversifikimi i burimeve të energjisë elektrike. Rrallë të ketë një vend me potencial të tillë për diversifikimin e burimeve të energjisë elektrike?, theksoi ish-kryeministri./ CNA.al