Në prag të sezonit turistik/ Manastirliu flet për masat: Duhet të rrisim përqindjen e vaksinimit

14 Prill 2022, 18:53, Lifestyle CNA

Ministrja e Shëndetësisë Ogerta Manastirliu ka folur për masat anti-Covid dhe duke qenë në prag të sezonit turistik, Manastirliu theksoi se duhet të rritet përqindja e vaksinimit të popullsisë, duke qenë se ka ende njerëz që nuk janë vaksinuar.

Në një intervistë Klan News, e pyetur, nëse kanë menduar një regjim për turistët që do të vijnë nga jashtë, Ministrja theksoi se kjo varet nga vendimet e Komitetit të Ekspertëve.

?Patjetër që situata me Covid është shumë e relaksuar nëse do ta krahasonim me një vit më parë, kemi një situatë të kontrolluar, por kjo nuk do të thotë që ne të humbim vigjilencën dhe aq më tepër të krijojmë ato premisa që nesër mund të na sjellë rritje të rasteve kur ne e dimë që ende kemi popullatë të pavaksinuar, prandaj duhet të synojmë që edhe këto muaj që kanë mbetur para sezonit turistik, ne të rrisim përqindjen e mbulesës vaksinale, në mënyrë që të jemi të mbrojtur gjatë sezonit.

Ne e dimë që do të kemi shumë turistë. Përsa i përket masave është Komiteti i Ekspertëve ai që do ta vlerësojë në dinamikë. E rëndësishme është që nëse neve rritemi me përqindjen e mbulesës vaksinale dhe nëse situata do të jetë ashtu sikurse është dhe do të shikojmë dhe vendet e tjera europiane dhe vendet nga ku turistët do të vijnë për të parë se si do të sillemi dhe me masat që kanë mbetur dhe që janë kryesisht masat në kufijtë, si certifikata e vaksinimit. Sigurisht të gjithë ne duam që t?i rrëzojmë të gjitha masat jo vetëm në funksion të turizmit, por edhe rikthimit të normalitetit për të pasur lëvizje dhe mobilitetin që ne të gjithë duam të kemi?, tha Manastirliu.

Në lidhje me turizmin vendas, nëse do ketë më kufizim oraresh apo kufizime të tjera, Manastirliu theksoi se mbetet për tu parë dinamika, ndërsa iu bën apel qytetarëve të vaksinohen.

?Praktikisht ne sot nuk kemi një kufizim të orarit, ka rënë ora policore, por do të shohim në dinamikë. Edhe në tërësi Komiteti i Ekspertëve ka qenë shumë i kujdesshëm me marrjen e masave duke qenë se edhe ekonomia ka rolin e saj, por mbi të gjitha në majën e piramidave të vlerës mbetet shëndeti dhe kujdesi ndaj tij. Kështu që prandaj jemi duke insistuar për vaksinimin derë më derë dhe për apelin e vaksinimit?, është shprehur Manastirliu./ CNA.al