Gjoba dhe hapje e procesit disiplinor për një lojtar të Kategorisë Superiore, Disiplina bën “kërdinë”

23 Nëntor 2021, 18:08, Sport CNA

Komisioni i Disiplinës ka marrë vendimet për javën që lamë pas, sa i përket gjitha niveleve të futbollit shqiptar. Si herët e tjera, edhe këtë herë, veprimet antisportive nuk janë toleruar aspak. Partizani dhe Teuta janë gjobitur për shkak se lojtarët nuk kanë vendosur stemën e Abissnet Superiore në mëngën e djathtë. Gjithashtu, bëhet me dije se është hapur proces disiplinor për Vangjel Zguron.

Lojtari i Skënderbeut ka qënë gjatë gjithë fillimit të edicionit i pakënaqur me mënyrën sesi është arbitruar, duke dalë edhe haptas. Rasti i fundit i takon sfidës mes Teutës dhe Skënderbeut, ku pati protesta nga ana e tij. Kështu, drejtësia sportive në vend e ka parë të arsyeshme të hapë një proces disiplinor.

Në listën e gjatë të dënimeve janë edhe ekipe si Besa, Iliria apo Murlani. Në fund shkruhet se janë rrëzuar kërkesat e zyrtarit të KF Egnatia, Eduart Thartori dhe zyrtarit të Labëria FC, Zoi Meço.

Gjithsej në total janë 17 vendime, të cilat do hyjnë në fuqi menjëherë.

Vendimet:

FK Partizani, për mosrespektim të përsëritur të Rregullores së Veprimtarisë Futbollistike, duke mos vendosur stemën e Abissnet Superiore, në mëngën e djathtë të fanellës së lojës, në bazë të neneve 63.1, 82.1 të Rregullores së Veprimtarisë Futbollistike dhe nenit 14 të KDS, dënohet me gjobë në masën 100.000 (njëqind mijë) lekë.

KF Teuta, për mosrespektim të përsëritur të Rregullores së Veprimtarisë Futbollistike, duke mos vendosur stemën e Abissnet Superiore, në mëngën e djathtë të fanellës së lojës, në bazë të neneve 63.1, 82.1 të Rregullores së Veprimtarisë Futbollistike dhe nenit 14 të KDS, dënohet me gjobë në masën 100.000 (njëqind mijë) lekë.

Çeljen e hetimit disiplinor për lojtarin e KF Skënderbeu, Vangjel Zguro.

FK Tomori, për sjellje të gabuar të spektatorëve, hedhjen e sendeve në terrenin sportiv, në bazë të neneve 65/1 dhe 65/3/c të KDS, dënohet me gjobë në masën 50.000 (pesëdhjetë mijë) lekë. Në zbatim të nenit 116/1/a të KDS, gjoba të aplikohet në masën 50%.

Lojtari i FC Besa, Erald Hyseni, për sjellje josportive ndaj kundërshtarit, në bazë të nenit 47/1/d, dënohet me 4 (katër) ndeshje pezullim nga aktiviteti.

FC Besa, për sjellje të gabuar të spektatorëve, hedhjen e sendeve në terrenin sportiv, në bazë të neneve 65/1 dhe 65/3/c të KDS, dënohet me gjobë në masën 50.000 (pesëdhjetë mijë) lekë. Në zbatim të nenit 116/1/a të KDS, gjoba të aplikohet në masën 50%.

Iliria, për sjellje të gabuar të spektatorëve, hedhjen e sendeve në terrenin sportiv, duke shkaktuar ndërprerjen e përkohshme të lojës, në bazë të neneve 65/1, 65/3/a, 65/3/c, dhe 65/4/b të KDS, dënohet me gjobë në masën 50.000 (pesëdhjetë mijë) lekë dhe zhvillimin e 4 (katër) ndeshjeve pa spektatorë. Në zbatim të nenit 116/1/b të KDS, gjoba të aplikohet në masën 20%.

K.F Murlani, në bazë të nenit 12 të KDS, paralajmërohet se në rast të dështimit në përmbushjen e detyrimeve dhe përgjegjësive, do të jetë subjekt i masave disiplinore që parashikon Kodi i Disiplinës Sportive dhe Rregulloret e FSHF.

Zyrtari i Akademia e Futbollit U-17 B, Agim Bedini, për protestë ndaj vendimeve të zyrtarëve të ndeshjes, me gjeste dhe fjalë ofenduese, në bazë të nenit 55/2 të KDS, dënohet me 4 (katër) ndeshje pezullim nga aktiviteti.

FC Scutari U-19, për shkak të dështimit në përmbushjen e detyrimeve dhe përgjegjësive, duke u bërë shkak për moszhvillimin e ndeshjes së vlefshme për Kampionatin Kombëtar të Kategorisë së Parë U-19 ? Grupi A, kundër KF Burreli U-19, në bazë të neneve 30/1, 30/4/a dhe 63/1/b të KDS, humbet ndeshjen në tavolinë me rezultatin 0-3.

Lojtari i Shënkolli U-19, Sildi Lekgegaj, për sulm ndaj kundërshtarit, në bazë të nenit 47/1/e, dënohet me 6 (gjashtë) ndeshje pezullim nga aktiviteti.

Zyrtari i FC Internacional Tirana U-15, Ervin Canollari, për protestë ndaj vendimeve të zyrtarit të ndeshjes, me gjeste dhe fjalë ofenduese, në bazë të nenit 55/1 të KDS, dënohet me 4 (katër) ndeshje pezullim nga aktiviteti.

Rrëzimin e kërkesës së zyrtarit të KF Egnatia, Eduart Thartori, si të pabazuar në Kodin e Disiplinës Sportive.

Rrëzimin e kërkesës së zyrtarit të Labëria FC, Zoi Meço, si të pabazuar në Kodin e Disiplinës Sportive.