Pas thirrjes për rrëmbim kosash e sfurqesh/ Ilir Meta i kthehet "rrugës së zotit"

4 Qershor 2021, 11:29, Politikë CNA

Me 9 Qershor 2021, pra më pak se një javë, në Kuvend pritet të miratohet raporti i Komisionit të Posaçëm Hetimor Parlamentar për shkarkimin e Ilir Metës.

Sipas mazhorancës e cila kërkoi dhe nisi këtë hetim, Meta ka shkelur Kushtetutën, duke bërë thirrje për dhunë dhe luftë civile, para, përgjatë dhe pas zgjedhjeve të 25 Prillit.

Hetimet kanë konkluduar se Meta ka shkelur 17 nene të Kushtetutës, duke i hapur kështu rrugën Gjykatës Kushtetuese për shkarkim.

Nga ana tjetër Presidenti, është munduar të shfaqet i qetë, sikur nuk po ndodh asgjë.

Sot Meta, është parë në një pelegrinazh Elbasan në ceremoninë e Shën Joan Vladimirit dhe më pas doli në media, duke thënë ishte aty për të përçuar një mesazh bashkëjetese për të gjitha besimet e ndryshme.

Nga thirrjet për rrëmbim kosash dhe sfurqesh Meta duket se i është kthyer rrugës së zotit, ndoshta për të gjetur qetësinë dhe dashurinë që e trumbetonte më herët.

Pyetjes së gazetarëve se nëse u lut që të mos e shkarkojnë, ai iu përgjigj duke thënë, se lutja e tij ishte që zoti ti falë ata që sipas tij s’dinë çfarë bëjnë.

“Nuk ekziston asnjë lutje e tillë, lutja është zotit ti falë të gjithë ata që nuk dinë se çfarë bëjnë dhe ti udhëheqë të gjithë në rrugën e të mirës së përbashkët. Kjo ishte një përgjigje shumë e qartë. Kam ardhur për tiu bashkuar këtij mesazhi bashkëjetese të të gjithë besimeve të ndryshme dhe besoj se është e qartë”, u shpreh Meta për gazetarët.

Meta kohët e fundit është shfaqur i qetë në media, pa gjeste dhe aritkulacione, konform principeve nëse mund të themi kështu, që duhet të ketë një President.

Në fakt më mirë një President që shkon në rrugën e zotit se sa një President që bën thirrje për dhunë, që del i pirë në media dhe që kërcënon ambasadorë.

Këtë lloj Presidenti e kemi parë para fushatës, dhe përgjatë fushatës kryesisht. I rebeluar me tone të ashpra, apo dhe i dehur, Meta është shfaqur në ekrane, madje, madje, ka shkuar edhe më tej duke thënë se nëse kryeministri Edi Rama do të merrte 71 mandate ai do të jepte dorëheqjen, gjë që nuk e bëri.

Por, sot kemi një tjetër President, që në dukje është i qetë dhe që nuk le ceremoni fetare pa marrë pjesë, ndoshta jo për t?u lutur që mos ta shkarkojnë, por ndoshta për të shfrytëzuar ditët e fundit si President.

Por, sido që të veprojë dhe ngado që të shkojë, Metës nuk i bën dot derman më as njeriu as zoti./CNA.al