Gati rinovimet te Skënderbeu, Memelli do me çdo kusht dy titullarët

4 Qershor 2021, 11:41, Sport CNA

Pasi mbylli një sezon pozitiv me arritjen e objektivit minimal, duket se Migen Memelli do të fillojë të ndërtojë shumë shpejt Skënderbeun e sezonit të ri. Me konfirmimin e trajnerit, duket se korçarët kanë siguruar një pjesë të mirë të garancive për sezonin e ardhshëm me një projekt, ndryshe nga sezonet e tjera, por që e rëndësishme është se pritet të vijojë. Për këtë arsye, trajneri bardhekuq duket gati për të nisur një aventurë të re, duke u mbështetur te një pjesë e mirë e elementëve me të cilët arriti sukses në këtë pjesë të dytë të sezonit.

Në kushte të tilla, fillimisht Memelli do të duhet të ngrejë gjithçka mes lojtarëve që kanë një kontratë aktive me korçarët. Për këtë arsye projekti i Skënderbeut pritet që të nisë nga kapiteni Jorgo Meksi e të përfundojë më pas me Mensah në majë të sulmit. Nëse do të flasim për garanci, trajneri korçar ka për momentin 15 futbollistë, të cilët janë të garantuar edhe për një sezon tjetër me Skënderbeun. Kjo, për shkak të kohëzgjatjes së kontratës së tyre që është ende aktive. Me këta lojtarë Memelli po projekton ekipin e sezonit të ardhshëm, një pjesë e të cilëve titullarë të rëndësishëm të korçarëve edhe në këtë sezon të vështirë. Pjesa tjetër më pas mbetet për t?u konfirmuar edhe nga vetë kryepankina korçare.

Nëse do të flasim për një ekip që do të kërkojë dhe synojë të jetë rivalizues për sezonin e ri, normalisht që veç konfirmimeve, duhet të punojë fort për afrime dhe rikonfirmime të lojtarëve që ka pasur këtë sezon. Për këtë Memelli ka kërkuar pak kohë për të reflektuar dhe më pas për të vendosur piketat mbi ekipin që do të përfaqësojë Skënderbeun në sezonin e ri.

Gjithçka pritet të nisë nga Rexhepi dhe Sadriu, dy lojtarë të cilët Memelli i kërkon me çdo kusht t?i ketë pjesë të ekipit. E njëjta gjë mund të thuhet edhe për Zguron dhe Taipin, të cilët kanë mbajtur një peshë të madhe në këtë sezon dhe që me shumë mundësi do të jenë të parët që do të bisedojnë për rinovimin. Me arritjen e këtyre marrëveshjeve, trajneri bardhekuq do ta ketë më të thjeshtë që të tentojë afrime të tjera për të plotësuar më shumë ekipin për sezonin e ri. Sezon ku Skënderbeu do të vijë me objektiva krejt të ndryshme nga ky i mbyllur vetëm pak ditë më parë.