Faktet që rrëzojnë Lulzim Bashën/ Detajet që tregojnë manipulimin e 13 qershorit

26 Maj 2021, 11:01, Politikë CNA

Ka një qasje në opinionin publik, por edhe në atë të analistëve politikë, se në PD tashmë ka garë. Pra, do të ketë zgjedhje për kryetarë, sepse në garë janë katër kandidatë, nga të cilët tre prej tyre janë njerëz që mund ta rivalizojnë denjësisht Lulzim Bashën.

Por, në fakt po të shohim detajet, gara vihet në dyshim. Jo për faktin se ka kandidatë. Nuk mjafton të ketë kandidatë dhe të ketë garë. Mund të ketë garë edhe me një kandidat, sepse strukturat mund të votojnë kundër, të abstenojnë, ta rrëzojnë, të ketë një proces të rregullt zgjedhor, dhe mund të quhet garë. Me veten, gjithësesi. Por, është garë e ndershme.

Nga ana tjetër, emrat që janë përballë Lulzim Bashës pretendojnë se mund të ketë një garë dhe do ta mundin.

Në fakt, nuk mjafton të jesh si Edith Harxhi që prej katër vitesh ka mbajtur qëndrim kritik ndaj Lulzim Bashës, për të pasur garë dhe për ta mundur Lulin.

Nuk mjafton të jesh si Fatbardh Kadilli, i cili ka qënë katër vite bashkëpunëtor i Lulzim Bashës. E gënjeu në 2017 se do kandidonte këtë herë si deputet, e la jashtë listave dhe Kadilli doli sërish kundër.

Apo nuk mund të jesh si Agron Shehaj, i ardhur nga bota e biznesit, i akuzuar se mandatin e deputetit e ka ?blerë? me lek. U suportua në struktura dhe ka një imazh të ngritur në opinionin publik, por edhe në reagimin e strukturave duke përdorur makinerinë e call centerit. Dhe të pretendosh se ka garë dhe do ta fitosh këtë garë.

Së pari kjo garë duhet të respektojë disa rregulla, të cilat nuk janë. Dhe për t?u quajtur dinjitoze, e drejtë, do të duhet që ato të respektoheshin.

Së dyti, kjo garë nuk ka KQZ, nuk ka KQZ-në, e partisë. Atë e ka Lulzim Basha. Ka vendosur atje Jemin Gjanën. Ky i fundit shkoi e propozoi një strukturë emrash të caktuar, Enno Bozdo e refuzoi dhe e zëvëndësoi me Çlirim Gjatën.

Pra, KQZ-në e partisë e ka Lulzim Basha.

Nga ana tjetër, që të hysh në një garë duhet të kesh garancinë e listave. Pra, kush do të votojë? Cilët janë emrat? Nuk mund të shkojë çdo njeri nga rruga, dhe të votojë. Dhe listat janë lehtësisht të manipulueshme, ku kandidatët do ta kenë të pamundur ndoshta të çojnë njerëz për të kontrolluar situatën.

Çfarë gare do ketë pa listë zgjedhësish?

Çfarë gare do ketë kur listën e zgjedhësve e prodhon Endri Hasa, krahu i djathtë dhe një nga njerëzit më të besuar të Lulzim Bashës?

Shkojmë më tej, tek KQZ-ja e partisë, e cila duhet të ketë disa numërues.

Numëruesit sërish do t?i vënë Jemin Gjana me Lulzim Bashën.

Pra, do t?i numërojë PD, do t?i numërojnë njerëzit e Lulzim Bashës. Megjithëse mund të bëhet një numërim i hapur, duhet të keni parasysh se kutitë do të transportohen rrugës, sërish nga njerëzit e Lulzim Bashës.

Shkojmë me tej, tek komisionerët. Tek qendrat e votimit, apo degët e Partisë Demokratike, ku do të votohet. Kandidatët nuk kanë përfaqësues. Kush do t?i kontrollojë? Si do t?i mbulojnë këto qendra për 12 orë? Kryetarët e degëve nuk kanë paanësi. Ata janë të gjithë të Lulzim Bashës.

Kush ka shpresë se do të ketë garë, mund të shohë tek fushata. A do ketë fushatë? Patjetër që jo. Si mund të ketë fushatë për as 20 ditë?

Në datën 13 qershor bëhet votimi, ndërkohë që janë 71 degë të Partisë Demokratike. Janë 12 qarqe, të cilat kanë edhe bashki të mëdha brenda tyre.

Sa kohë do të duhet të bësh fushatë në qarkun e Tiranës, kur PD-ja ka 11 degë sipas minibashkive? Ka Kamzën, ka Paskuqanin, ka Kavajën e Rrogozhinën.

Nuk mjaftojnë kaq ditë për të bërë fushatën për Tiranën. Pa le të shkosh në Durrës, Fier, Lushnje, a të shkosh në Korçë, Devoll e Pogradec. Se kohë për të vajtur në Kolonjë e Përmet nuk ka. Por ndoshta askush nuk do të arrijë dot deri në Sarandë, Has apo Tropojë. Pa folur për Matin, Dibrën e më tej.

Prandaj janë këto fakte të sipërpërmendura, të paktën gjashtë detaje të një garancie të një gare të vërtetë elektorale, qoftë brenda apo jashtë partisë, të cilat vendosin fituesin.

Prandaj dhe tre rivalët e Lulzim Bashës kanë hyrë në garë me diferencë, pra me shifër disavantazhuese. Ata kanë hyrë në garë me minus. Nuk kanë asgjë, as lista, as vëzhgues, as numërues, as KQZ-në e partisë dhe as kohë për të bërë fushatë.

Me të gjitha këto kundër, ata janë në garë përballë Lulzim Bashës, i cili po kërkon të marrë mandatin e tretë si kryetar i PD-së, pasi e vetmja gjë që garon me Edi Ramën është se aq mandate sa ka Rama në pushtet, aq do të rrijë edhe Luli në opozitë.

Por, këtë herë mesa duket ka zgjedhur që mbajtjen e karriges së kryetarit ta bëjë me një process totalisht të manipuluar, edhe më qesharak se ai me Eduard Selamin, edhe më të dhunshëm dhe të manipuluar e falsifikuar se ai me Sokol Olldashin. Por, përballë ka tre personazhe, të cilët kush nga qejfi, kush nga inati, e kush i përdorur, do i shërbejnë si fasada e kësaj fushate që nuk po sjell asgjë tjetër, thjeshtë dhe vetëm një garë të manipuluar, që kushdo që do ta fitojë, do të ishte një ?bingo? e madhe, në rast se emri i tij nuk do të ishte Lulzim Basha. Me Lulin duketr qartë që fiton vetëm Jemini./ CNA.al