"Ndalimi i koalicioneve qëndrim neo-diktatorial i Ramës"/ PAA thirrje SHBA dhe BE

18 Shtator 2020, 13:34, Politikë CNA

Partia Agrare Ambientaliste i drejtohet partnerëve strategjikë të vendit tonë SHBA dhe BE, organizatave ndërkombëtare si OSBE-ODHIR, presidentit të Republikës, kryetarit të kuvendit por edhe opinionit publik për të eleminuar pengesat dhe vonesat e qëllimshme qe sipas PAA, Rama po i bën zgjedhjeve parlamentare të lira dhe të ndershme 2021.

Në deklaratën e PAA thuhet se është fatkeqësi kombëtare që Rama po bllokon dhe vonon në mënyrë të përsëritur përmbushjen e 15 kushteve për çeljen e negociatave me BE.

?Është shenjë e qartë e qëndrimit autokratik dhe anti-europian i Ramës, bllokimi prej tij disa herë i procesit të integrimit të vendit nga Ruzhdia 2009 deri sot në Rilindja 2020.

Në asnjë vend partitë politike nuk bllokohen me ligj se si do ti formojnë koalicionet e tyre. Koalicionet njihen si subjekte elektorale në çdo demokraci funksionale. Forma dhe përzgjedhjet konkrete duhet të jenë në liri të plotë të partive politike se me kë do të konkurojnë. Çdo alibi tjetër është thjesht një provë e qartë e mentalitetit neo-diktatorial. Rama e ka më kollaj të përkushtohet për lobim personal nëpër Euro-Azi se sa të lehtësojë zgjedhjet e lira dhe të ndershme në Shqipëri. Rama e ndjen derën e përplasur në fytyrë nga shumë kancelari europiane për promovimin e kriminelëve në politikë dhe vjedhjen e votave.

PAA edhe njëherë apelon publikisht se vonesat dhe pengesat e qëllimshme të Ramës vërtetojnë se Rama i fiton zgjedhjet vetëm kur bën aleanca kriminale me kriminelët dhe vetëm kur i vjedh votat. Prandaj shqiptarët kanë mbetur të fundit për zgjedhje të lira dhe të ndershme. Shqiptarët janë të fundit për të penguar keqpërdorimin e qeverive për përfitime elektorale. Shqiptaret kanë mbetur të fundit në Europë për të numëruar, nxjerrë dhe pranuar rezultatet e zgjedhjeve. Por ndërsa shqiptarët kanë mbetur të fundit për një demokraci funksionale, Rama është renditur i pari jo vetëm në Europë për bllokimin e zgjedhjeve të lira dhe të ndershme, për promovimin e kriminelëve në mandate politike, për vjedhjen e votave dhe për korrupsionin epidemik dhe kapjen e shtetit.

PAA ju bën thirrje partive të koalicionit por edhe partive të tjera dhe sidomos të rinjve dhe përfaqësuesve të shoqërisë civile të luftojnë me votë neo-diktaturën që po kërcënon përditë dhe më shumë?, thuhet në deklaratën e PAA./CNA.al