“Heronjtë janë bërë telef!”/ Dasho ngre alarmin, çfarë po ndodh në spitalet COVID

27 Gusht 2020, 09:47, Lifestyle CNA

?Heronjtë janë bërë telef!? Kështu deklaron ekperti i Shëndetit Publik Erion Dasho, i cili krahason situatën aktuale në shëndetësi me kohën e komunizmit.

Dasho deklaron se në pavionet e spitale COVID-1 dhe COVID-2 ka mungesë ajri të kondicionuar, mungesë pajisjesh të domosdoshme, mungesë medikamentesh dhe mungesë ushqimesh të përshtatshme.

Sipas tij, kjo situatë në spitale është krijuar për shkak të planifikimit dhe menaxhimit katastrofik të COVID-19 në Shqipëri.

?Kështu u përkthye në kohën e shqipërimeve entuziaste, titulli i filmit të famshëm francez ?Heronjtë janë të lodhur?. Më pas kjo frazë hyri në përdorim të gjerë kryesisht për të shpotitur ata që lodheshin nga punët e jetës së përditshme. Ky nuk është aspak rasti i bluzave të bardha të dy spitaleve COVID-1 dhe COVID-2, të cilët realisht janë ?bërë telef? prej muajsh në shërbim të pacientëve të shtruar në këto spitale.

Të dhënat që dalin nga pavionet e tejmbushur flasin për mungesë ajri të kondicionuar në kushtet e verës së nxehtë mesdhetare dhe mungesë pajisjesh të domosdoshme (si CPAP dhe BiPAP të cilat janë duke i blerë familjarët). Përflitet edhe për mungesë medikamentesh dhe ushqimesh të përshtatshme, madje media raportoi edhe mungesë uji që zgjati disa ditë.

Në bazë të gjithë problemeve lidhur me menaxhimin e COVID dhe ngarkesat stërmunduese të kolegëve tanë, nuk janë ato mungesat e ?zakonshme? me të cilat jemi mësuar tashmë me sistemin tonë shëndetësor, por planifikimi dhe menaxhimi katastrofik i COVID-19 në Shqipëri. Pjesa më e madhe e pacientëve të shtruar në COVID-1 dhe COVID-2 nuk kanë nevojë për shtrim në një qendër terciare?, shkruan ai në rrjetet sociale.

Eksperti pretendon se nëse do të ishin diagnostikuar herët dhe ndjekur sipas protokolleve, këta pacientë ndoshta nuk do të kishin patur nevojë për trajtim spitalor.

Dasho thotë se pjesa dërrmuese e tyre mund të ishin trajtuar në spitalet rajonale, me pajisje tepër të thjeshta dhe me protokolle po aq të thjeshta sa edhe protokollet e trajtimin në shtëpi nga mjeku i familjes.

?Fakti që asnjë nga këto hapa nuk u ndërmorr megjithëse kanë kaluar tetë muaj nga fillimi i pandemisë, është thelbi i gjithë situatës që shohim sot në spitale. Mjekëve të COVID-1 dhe COVID-2 nuk ua ka imponuar heroizmin situata epidemiologjike e covid-19 në Shqipëri, por papaftësia dhe mungesa e vizionit të menaxherëve dhe drejtuesve të ministrisë dhe komitetit.

Ata ngjajnë si dy pika uji me heronjtë e kohës së Komunizmit të cilët liheshin pa mjete pune për të përballuar fatkeqësitë natyrore të kohës për t?u shpallur heronj pas vdekjes. Në kohën e sotme, nuk ka nevojë për të tillë heronj dhe as për sakrificat mbinjerëzore të kolegëve tanë! Thjesht duhet profesionalizëm, vizion dhe aftësi organizative normale nga ata që kanë marrë përsipër drejtimin e shëndetësisë?, nënvizon ai./ CNA.al