web counter
LEXO PA REKLAMA!

SHKARKO APP

App Store
Google Play

E fundit!

x

Strategjia për shkollat/ Si po vepron Maqedonia e V., Kosova, Mali i Zi e Shqipëria

18 Gusht 2020, 19:27, Sociale CNA

Shtatori po afron dhe vendimi për hapjen e shkollave është një sfidë për qeveritë e të gjitha vendeve përfshi edhe ato të Ballkanit.

Teksa vala e koronavirusit parashikohet të përhapet në vjeshtë, vendet e rajonit përfshi edhe Shqipërinë, kanë njoftuar, madje edhe kanë marrë vendime se shkollat do të hapen.

Në Maqedoninë e Veriut, në klasa do të shkojnë vetëm nxënësit e klasave të para, të dyta, e të treta; në Mal të Zi është vendosur të hapen por në muajin tetor; në Shqipëri është njoftuar hapja e tyre sot, ndërsa në Kosovë po shihen 3 skenarë, përfshi edhe ai i moshapjes së klasave, e mësimi të ndiqet në distancë.

CNA.al sjell një panoramë të asaj se çfarë propozojnë qeveritë e shteteve pranë nesh.

Maqedoni e Veriut

Qeveria e Maqedonisë së Veriut ka miratuar sot vendimin për të hapur shkollat e arsimit parauniversitar vetëm për nxënësit nga klasa e parë në të tretën.

Për gjithë pjesën tjetër të sistemit arsimor mësimi do të zhvillohet online. Ky vendim është marrë për shkak se në familje të caktuara ka prindër me sëmundje kronike dhe nuk duhet të rrezikohen nga COVID-19. Por edhe në klasat e vetme që do hapin dyert për nxënësit në vitin e ri shkollor, do të ketë protokolle strikte dhe masa për të parandaluar përhapjen e COVID-19.

?Gjithashtu, me kërkesë të prindit, fëmijët nga klasa e parë e deri në të tretën do të mund ta ndjekin mësimin e plotë edhe online. Pas bisdimeve intenzive me prindërit dhe personat tjerë profesionist kemi vendosur të lejojmë të ketë zgjedhje ana e prindit. Shkaku është se në disa familje të caktuara ka prindër të cilët janë të sëmurë kronikë me rrezik të lartë shëndetësor??, deklaroi Venko Filipçe, ministër i Shëndetësisë.

Mali i Zi 

Mali i Zi ka shtyrë fillimin e vitit të ri shkollor më 1 tetor, pasi autoritetet shëndetësore kanë vlerësuar se fillimi i rregullt i vitit shkollor, në shtator, mbart rrezik për shëndetin e fëmijëve.

Lajmi u bë me dije nga Ministria e Arsimit e Malit të Zi, e cila shtoi se vendimi për shtyrjen vlen për shkollat dhe kopshtet. Ministria sqaroi se gjatë ditëve në vijim Instituti i Shëndetit Publik dhe përfaqësuesit e sistemit arsimor, do të shpallin rekomandimet në bazë të të cilave do të bëhet mënyra e organizimit të klasave në shkolla dhe kopshte.

Vendimi është marrë me rekomandimin e Institutit të Shëndetit Publik, për shkak të pasigurisë me situatën epidemiologjike, e cila, siç thonë zyrtarët, edhe pse nën kontroll, është ende e komplikuar.

Institucionet parashkollore në Mal të zi filluan të punojnë më 4 qershor, por, pas përkeqësimit të situatës epidemiologjike, ato u mbyllën përsëri më 1 korrik.

Kosovë

Më 1 shtator në Kosovë, fillon viti i ri shkollor 2020/2021 dhe Qeveria e Kosovës është duke shqyrtuar mundësitë se si të bëjnë hapjen e shkollave në mënyrë të sigurt për shkak të pandemisë së COVID -19. Ministri Arsimit dhe Shkencës në Qeverinë e Kosovës, Ramë Likaj, ka thënë se në vitin e ri shkollor, që fillon më 1 shtator, nxënësit e klasave të para dhe të dyta, procesin mësimor pritet të fillojnë në hapësirat shkollore. Por, në Kosovë deri më sot ka skenarë dhe jo vendim.

Skenari A parashikon mësim me prezencë në institucionet parashkollore dhe shkolla, duke zbatuar rekomandimet e autoriteteve shëndetësore për masat mbrojtëse ndaj COVID-19. Skenari B ka të bëjë me rikthimin e pjesshëm (mësimi i kombinuar ? prezencë dhe mësim në distancë). Në këtë alternativë, prioritet janë klasat 1 deri 5, ku parashihet që numri maksimal në klasë të jetë 10 nxënës, orari i shkurtuar dhe mësim plotësues online. Kurse skenari C parasheh mësimin nga distanca nëpërmjet transmetimit të mësimeve të regjistruara në televizionin publik.

Shqipëri 

Në vendin tonë njoftimi për hapjen e shkollave është lajmëruar sot.  Nxënësit do të rikthehen në bankat e shkollat në vitin e ri shkollor që do të nisë në muajin shtator. Ministrja e Arsimit Besa Shahini u kërkoi sot 61 bashkive të vendit që të nisin pastrimin e shkollave për t’i bërë gati për në shtator. Ministrja Shahini u shpreh se qëllimi është hapja e shkollave për të gjithë nxënësit e arsimit parauniversitar, por sipas specifikave të ndryshme, në varësi të shkollës, numrit të nxënësve, etj.

“Kemi zhvilluar një pyetësor për shkollat te nxënësit, prindërit dhe mësuesit, 87% mendojnë se duhet të kthehemi në shkollë në fillim të vitit shkollor dhe vetëm 13% duan kushte shtëpie. Ne pajtohemi me ju dhe prandaj kemi zhvilluar disa skenarë për mundësinë e hapjes së shkollave në varësi të shkollës, numrit të nxënësve, gjendjes së shkollave dhe nevoja të komunitetit për të qenë fizikisht në shkolla”, ka thënë Shahini, por opozita ka kërkuar të bëhet publike strategjia e plotë. /CNA.al

 

 





Lajmet e fundit nga