"Është tepër vonë dhe pak"/ Basha: Rama mos t'i trajtojë paratë e qytetarëve si të vetat

22 Prill 2020, 16:22, Politikë CNA

“Nuk ka më kohë për të marrë masa pak nga pak”. Kështu deklaroi pak më parë kryetari i opozitës Lulzim Basha, teksa po fliste për masat që ka marrë dhe po merr qeveria për të përballur pandeminë e koronavirusit.

Basha kërkoi të anullohen të gjitha kontratat me PPP-të dhe paratë të shkojnë për t’u ardhur në ndihmë qytetarëve.

“Është tepër vonë, tepër pak. Të gjitha kontratat me PPP-të duhet të pezullohen dhe këto para duhet të shkojnë drejtpërdrejt për njerëzit në nevojë. Është e pafalshme që qeveria dhe kryeministri t’i trajtojë paratë e shqiptarëve si lekët e veta”, tha ai në një lidhje me emisionin “Pasdite me Xhaxhiun”.

Sipas kryedemokratit, situata është keqmenaxhuar dhe tashmë është krijuar një hendek që po zgjerohet.

“Unë shoh një keqmenaxhim të situatës nga mungesa e një plani e për pasojë shkohet kuturu. Tjetër gjë thuhet gjatë ditës për të njëjtën gjë. Për të mbuluar të vërtetën e dhimbshme që shqiptarët e panë edhe nga tërmeti, një shtet kartoni, kanë propagandën nga mëngjesi deri në darkë që nuk merren kurrë me thelbin e çështjes. Dhe thelbi është plani kombëtar ekonomik. Imagjinoni edhe ata që konsideroheshin shtresë e mesme nuk kanë të ardhura. Kërkesa jonë është që t?i dilet përpara të vërtetës sepse propaganda nuk i mbush tavolinat e shqiptarëve.

Ka një faturë konkrete për çdo vendim që nuk merret apo merret por nuk zbatohet. Akoma nuk ka një dërgesë konkrete për të gjithë ata që kanë përfituar nga paketa ekonomike. Ju kërkuam një paketë të ngjashme me të Kosovës tek e fundit, të ndërhynin menjëherë që biznesi u kap menjëherë ngusht, nuk e bënë, vetëm folën. Tani është krijuar një hendek që po zgjerohet. Me atë që propozuan tani ka një mbështetje ndaj atyre që kanë mbetur pa punë. Kryeministri refuzon propozimin tonë për të hequr për dy oligarkë 50 mijë euro për të kompensuar dhe paguar të papunët. Masat nuk janë marrë kemi dhjetra të infektuar, kostoja financiare është shumë më e lartë?, nënvizoi lideri i PD-së./ CNA.al