Editorial/ Liria e shprehjes fillon tek LIRIA

19 Dhjetor 2019, 09:52, Politikë CNA

Dje Kuvendi miratoi një paketë amendamentesh në ligjin “Për Mediat”!

Miratimi u parapri dhe po pasohet nga një debat intensiv për rreziqe, përmbysje, neodiktatura e të tjera si këto.

Persona publik, analistë, tekstshkrues artikujsh dhe editorialesh, janë përfshirë në një garë sulmesh ndaj një seti amendamentesh të denominuara si ligji antishpifje.

Të pavemendshëm ndaj këtij denominimi, pothuaj të gjithë po tregohen të pakujdesshëm deri në piken që e sulmojnë setin e amendamenteve, duke ju referuar edhe vetë si “ligji antishpifje”.

Pa kuptuar se kështu po dalin si mbrojtes të shpifjes, po harrojnë që debati sot mund të kishte sens të kanalizohej drejt diskutimeve për cilësinë dhe saktësinë e lajmit. Ky ligj mund ti shërbente më se miri hapjes se debatit profesional midis gazetarësh, për profesionin, sesa të shndërrohej në një luftë kaps për disa amendamente që nuk kanë dhe s’kanë për të pasur kurrë fuqinë që të mposhtin lajmin.

Debati më i madh sot mund të ishte debati i lirisë së gazetarëve brenda mediave, si të punësuar, nganjëherë të pa ose keqpaguar, si rrogëtarë që i nënshtrohet sistematikish një ligji të pashkruar për autocensurë, ose si kopjues të rëndomtë tekstesh të gatshme faqesh, mediash të tjera, apo edhe njoftimesh për publik të zyrave të shtetit ose opozitës.

Liria e shprehjes është e drejtë universale, ndaj nuk ka ligj që mund ta ndalojë. Debati jonë me këtë rast mund të ndërtohej në mbrojtje të profesionit. I ndërtuar si sulm ndaj disa neneve të mjera, nuk e mbron dhe akoma më keq po rrezikon të dëmtojë profesionin, pasi po dukemi si mbrojtësit e shpifësit të maskuar si gazetar.

Ne i dimë! Ne i njohim!

Njerëz që ndotin përditë profesionin e gazetarit!

Personazhe gjobvënës që publikojnë lloj lloj “thashethemesh” pa asnjë interes publik, por që prekin familje dhe jetë njerzish e që bëhen vetëm për këtë qëllim.

Thashetheme të stisura si “lajm”, veç për faktin se filani apo filanja nuk na duket simpatik.

Kjo është çështja që duhet ti nënshtrohet një debati të vërtetë, pse jo edhe deontologjik për profesionin e gazetarit.

Sa i takon frikës se Rama apo dikush para apo pas tij, po rrezikokan lirinë e shprehjes, kjo është thjesht “jogazetari”.

Liria e shprehjes, buron nga liria! Nga ajo liri që secili e gjen tek vetvetja dhe i buron nga e vërteta.

Dhe LIRIA nuk është çështje liçence apo vërtetimi. Është çështje vlerash dhe të vërtetash. Vlerat dhe të vërtetat nëse sulmohen shumëfishohen. Me këtë debat po rrezikojmë ti trajtojmë shqiptarët si hajvanë që presin që kriterin e të vërtetës që besojnë, ta ndajnë analistët në televizione.

Shqiptarët fatmirësisht janë më të mençur se shpifësat./ Elvi FUNDO-CNA.AL