Vendimi për Arben Çukon/ Ish ministri i Ramës:Turp, por është pak!

1 Gusht 2019, 11:30, Kronika CNA

Ish-Ministri i Drejtësisë në qeverinë Rama 1, Ylli Manjani ka reaguar referuar lirimit të ish-deputetit Arben Cuko. Përmes një postimi në rrjetet sociale, Manjani e ka konsideruar heqjen e masës ekstreme ndaj ish deputetit sshembull të arrestimeve bolshevike, teksa shton se e gjitha kjo është bërë për një show politik.

Në reagimin e tij ish-ministri ka sjellë edhe njëherë në vëmendje Reformën në Drejtësi, të cilën me fjalë të tjera, e ka konsideruar si të dështuar, ndërsa shprehet se i është nënshtruar pushtetit të sotëm politik.

Manjani shpreh bindjen se “Arben Çuko është viktima e radhës e kësaj praktike bolshevike, të Rilindur tashmë!”

Kujtojmë se ditën e sotme, Gjykata e Krimeve të Rënda, i ka ndryshuar masën e sigurisë ish-drejtorit të burgjeve dhe ish-deputetit të PS-së, Arben Çuko, nga “arrest me burg” në masën ?detyrim paraqitje?, ndërsa mësohet se gjykimi ndaj tij do të vijojë në gjendje të lirë.

Postimi i plotë i Manjanit:

Heqja e masës ekstreme të sigurisë ndaj Arben Çukos, më sjell edhe njëherë në vemendje praktikën bolshevike të arrestimeve për show publik.

Reforma në drejtësi jo vetëm nuk e mbylli këtë praktikë bolshevike, por përkundrazi e përkeqësoi.

Pas 2017-ës kjo praktikë u përkeqësua për shkak të mbivendosjes praktike të policisë mbi prokurorinë dhe terrorit të presionit kriminal ndaj gjykatës.

Pra me pak fjalë, për të fituar pikë në publik të arrestojnë e të telendisin mbi bazë supozimesh, thashethemesh apo edhe denoncimesh të pa provuara.

Por të duartrokitura nga publiku, i cili gënjehet paq me lajmin e arrestimit, pa e vrarë mendjen se ndaj të arrestuarit nuk ka asnjë provë dhe se arresti nuk i shërben drejtësisë, por fshehjes së saj!

Pa kryer asnjë veprim hetimor fakt-mbledhës, nxitohet të shpallet arresti në burg si masë sigurie, pa e çarë kokën fare se ke të bësh me lirinë e të drejtat themelore të dikujt, madje pa e vrarë mendjen fare që akuza nuk mbështetet në prova.

Vini re: gjithnjë reklamohet puna e policisë që të heton e të arreston e të dënon madje…

Arrestime të pastra bolshevike!

Paaftësi totale provuese e drejtësisë! Kjo e fundit duket sikur thjesht legalizon atë që shpall publikisht policia politike e pushtetit!!!

Kjo sjellje e drejtësisë në fakt bëhet gjithnjë e më shumë vulnerabël ndaj pushtetit politik të radhës. Aktualisht, e nënshtruar thuajse totalisht ndaj pushtetit të sotëm.

Reforma në drejtësi nuk e zgjidhi këtë bolshevizëm juridik, përkundrazi e përkeqësoi.

Jam i bindur që Arben Çuko është viktima e radhës e kësaj praktike bolshevike, të Rilindur tashmë!

Kjo bindje më përforcohet edhe nga fakti se pas kaq kohësh nën masë ektreme sigurie ende ndaj tij nuk ka një akuzë të provuar në gjykatë.

Pra masa e sigurisë ishte thjesht populiste. Një masë që e vuan personi, që të trashë menderen udhëheqësi në pushtet.

Turp, por është pak!