Sa mundësi ka që Gjykata Kushtetuese të hapë dyert në Shtator?

30 Korrik 2019, 15:13, Kronika CNA

Sipas të dhënave zyrtare nga Këshilli i Emërimeve në Drejtësi, garën për anëtarë të Gjykatës Kushtetuese, e vazhdojnë ende, gjyqtarja e Tiranës, Regleta Panajoti, prokurori i Krimeve të Rënda, Besnik Muçi, këshilltarja ligjore Arta Vorpsi si dhe këshilltarja ligjore Fiona Papajorgji.

Besnik Muçi është kandidat për shkarkim nga KPA, ndaj për analizën e mëposhtme, nuk mund të konsiderohet si kandidat për gjyqtar në Gjykatën Kushtetuese.

Gjykata Kushtetuese kërkon të pakten 5 anëtarë, që të mund të mblidhet për të marrë vendime.

Duke i konsideruar të treja kandidaturat si fituese, mund të arsyetojmë që tre anëtarë jane boll, që Gjykata Kushtetuese të mund të mblidhet në dhomë këshillimi. Por, jo më shumë.

Me shumë gjasë, në Shtator do të arrijmë të kemi përmbylljen e procedurave, për aq vende sa mund të plotësohen nga këto 3 kandidatura.

Por, a do kemi emërimin e tre anëtarëve të rinj të Gjykatës Kushtetuese?

Kushti i ligjit është që për çdo vend bosh, duhen 3 kandidatura të vlefshme.

Dmth nëse përdorim tabelën e shumëzimit, për tre vende bosh duhen 9 kandidatura të vlefshme.

Të arsyetojme pak me logjikën e Ligjit dhe jo me llogaritë e Dvoranit.

Kandidaturat janë 3:

– Regleta Panajoti;

– Arta Vorpsi;

– Fiona Papajorgji.

Secila prej tyre ka kandiduar për tre vende bosh.

Dmth për secilin nga 3 vendet, lista e kandidaturave do të jetë njësoj. Mbase edhe radha do jetë e njëjtë, se duke qenë vlerësim me pikë, për të njëjtën gjykatë, do ish e pamundur që vlerësimi për të njëjtat kandidatura, të rezultonte me radhitje të ndryshme.

Por, plotësimi i vendeve bosh bëhet një nga një. Se edhe shqyrtimi do të bëhet një nga një për secilën vakancë.

Në këto kushte, në momentin që një nga zonjat përzgjidhet për njërën vakancë, plotësimi i dy vakancave të tjera është i pamundur, pasi lista e kandidaturave për vakancën e radhës do reduktohej në 2.

Ligji kërkon përzgjedhje midis 3 kandidaturave.

Ligji nuk ka rregulluar fare rastin kur një kandidat kandidon për më shumë se një vend bosh.

Dhe ky është nje nga shume rastet e gafave juridike që zbulojnë mungesën e vizionit të ekspertëve të nivelit të lartë që u paguan si draftues të ligjit.

Me një ligj të shkruar kështu, Ilir Meta ka edhe rastin të bëjë gallatë me listat e kandidaturave.

Dhe për gallatë mund të zgjedhë edhe të njëjtin emër tre herë, në tre lista. Fundja kush do e paragjykonte sidomos në rastin, kur te secila liste do zgjidhte njëkohësisht kandidaturën e parë të dalë nga vlerësimi i pavarur i KED?!

Ashtu mbase do kishim plotësim të tre vakancave përnjëherë.

Pak rëndësi, nëse do ish i njëjti person. Fundja vetëm për dhomë këshillimi, njësoj është. Si 1×3 edhe 3×1 rezultati del njësoj.

Për saktësi! Do jenë 2 ose 4 anëtarë! Se ne Gjykatën Kushtetuese, ka një vit që dritat i ndez e i fik Vitore Tusha, megjithë moshën për pension./CNA.al