web counter
LEXO PA REKLAMA!

SHKARKO APP

App Store
Google Play

Operacion në Mitrovicë/ Dyshohet për dy policë të plagosur

28 Maj 2019, 07:06, Aktualitet CNA

Dy efektivë dyshohet se kanë mbetur të plagosur, nga një operacion që policia e Kosovës po zhvillon në veri dhe jug të Mitrovicës, i cili, deri tani, ka rezultuar me ndalimin e disa zyrtarëve policorë dhe të disa qytetarëve.

Të ndaluarit dyshohet se janë të përfshirë në disa vepra penale, si: pjesëmarrje ose organizim i grupit kriminal, kontrabandim me mallra, keqpërdorim i pozitës zyrtare, dhënie e ryshfetit, tregti e ndaluar e të tjera.-raporton REL.

Bëhet e ditur se operacioni po realizohet në bashkëpunim me organet e drejtësisë dhe Inspektoratin Policor të Kosovës.

Kryeministri i Kosovës, Ramush Haradinaj, tha se operacioni policor në veri ka në shënjestër individë të përfshirë në kontrabandë, krim të organizuar dhe aktivitete të tjera kriminale.

“Disa prej personave të përfshirë në këto vepra janë zyrtarë doganorë, policë por edhe qytetarë të rëndomtë. Operacioni u zhvillua me sukses edhe në komunat veriore të Kosovës. Si kryeministër i vendit, konfirmoj se bëhet fjalë për zbatim të ligjit dhe asgjë tjetër. Ftoj serbët e veriut ta ruajnë qetësinë dhe ta respektojnë ligjin”, tha Haradinaj përmes një postimi rrjetet sociale.

Drejtori i Zyrës për Kosovën në Qeverinë e Serbisë, Marko Gjuriç, tha në Beograd se situata është “dramatike” dhe se ka pasur edhe të shtëna në veri të Kosovës.

Gjuriç tha po ashtu se përfaqësuesit e Listës Serbe – subjekt politik i serbëve të Kosovës – që morën pjesë në një sesion të posaçëm të Kuvendit të Serbisë të hënën, udhëtuan për në Kosovë këtë mëngjes.





Lajmet e fundit nga