Përplasja me protestuesit në Elbasan/ Shoqata e Policëve në Lirim “gozhdon” Xhafajn

3 Tetor 2018, 18:33, Aktualitet CNA

Shoqata e Punonjësve të Policisë në Lirim ka sulmuar Ministrin e Brendshëm, Fatmir Xhafaj, për menaxhimin e keq të protestës në Mengël të Elbasanit.

Sipas kësaj shoqate, dhuna ndaj fëmijëve, është kundër çdo norme morale, ligjore dhe profesionale.

Në reagim thuhet se ky veprim tregon se drejtuesit e policisë nuk kanë merak qytetarin dhe mbrojtjen e tij, por shkatërrimin total të misionit të policisë.

Ata i kanë bërë thirrje gjithashtu punonjësve të policisë, për të kundërshtuar çdo urdhër që bie ndesh me ligjin, pasi në të kundërt do të përballen me pasojat.

Deklarat e plotë

POLICIA E XHAFËS I SHTRINË TENTAKULAT E DHUNËS EDHE MBI FËMIJËT!

I paprecedent menaxhimi i protestës së nxënësve në Mengël të Elbasanit. E dënojmë dhunën e ushtruar ndaj fëmijve. Është veprim kundër çdo norme morale, ligjore dhe profesionale nga radhët e Policisë së Shtetit.

Kur protesta vjen nga fëmijë për një të drejtë themelore si shkolla, më e pakta është përulja ndaj tyre dhe të sigurohet një ambient i qetë dhe i sigurt që ata të shprehin kërkesat e tyre apo mosdakortësinë ndaj vendimit të marrë për mbylljen e shkollës.

Jo vetëm që nuk pamë profesionalizëm në radhët e policisë, por pamë të paparën ndonjëherë më parë, dhunë dhe barbarizëm ç’ka bëhet më e rëndë kur kjo ushtrohet ndaj fëmijve.

Një akt tjetër ky që tregon qartazi se drejtuesit e Policisë së Shtetit me në krye Ministrin Xhafa nuk kanë merak qytetarin dhe mbrojtjen e tij, por shkatërrimin total të misionit të policisë, inkrminimin e thellë të saj, presionin edhe ndaj strukturave për të shkelur ligjin.

I bëjmë thirrje çdo punonjësi policie të refuzojë urdhërat që bien ndesh me ligjin e policisë së shtetit, urdhërat që mohojnë të drejtën e qytetarëve dhe aq më tepër të fëmijve për të protestuar për një të drejtë që ia jep ligji dhe kushtetuta. Në të kundërt do të përballen ashpër me ligjin për çdo shkelje që ata bëjnë gjatë ushtrimit të detyrës.
Ne ju mbështesim për sa kohë kryeni detyrën konform ligjit ndërkohë evidentojmë çdo veprim tuajin në kundërshtim të hapur me ligjin për të cilat do jepni llogari.

Në këto vite drejtimi i Policisë së Shtetit është në kundravajte të misionit e ligjit, e ndërsa dje pamë fytyrën më të shëmtuar të saj! /CNA.al