Shkarkimet e gjyqtarëve/ Gjin Gjoni "sherr" me ministren e Ramës

26 Qershor 2018, 08:59, Aktualitet CNA

Ministrja e Drejtësisë Etilda Gjonaj, ka debatuar ashpër me gjyqtarin Gjin Gjoni në mbledhjen e fundit të Këshillit të Lartë të drejtësisë. Sipas gazetës “Shqiptarja.com”, mollë sherri është bërë kërkesa për shkarkimin e gjyqtarit të Shkodrës Ahmet Jangulli. Ky i fundit akuzohet se ka zvarritur procesin në pesë çështje administrative.

Me pretendimin se masa të tilla nuk janë në kompetencën e KLD, Gjin Gjoni dhe një grup anëtarësh, kanë rrëzuar të gjitha kërkesat e ministres. Brunilda Kadi, Eneida Civici, Petrit Çomo, Ridvan Hado, Neritan Cena, Astrit Haxhialushi dhe Gerd Hoxha kanë votuar kundër kërkesës së ministres Gjonaj për shkarkimin e gjyqtarit Ahmet Jangulli.

Të vetmit që kanë votuar pro shkarkimit të gjyqtarit, kanë qenë presidenti Ilir Meta dhe gjyqtari Vangjel Kosta.Gjatë mbledhjes, ministrja Gjonaj dhe gjyqtari Gjoni, kanë vijuar me interpretime ligjesh.

Gjoni e ka nisur debatin me nënin 172 për “statusin e gjyqtarëve dhe “dispozitat kalimtare”. Sipas tij, afati për procedim disiplinor mbaron 3 muaj pas hyrjes në fuqi të ligjit.

“Hetimet disiplinore të papërfunduara, -thotë neni 172 ?Dispozitat kalimtare? për procedimet disiplinore, -në datën e hyrjes në fuqi të këtij ligji, nga Ministria e Drejtësisë, Inspektorati i Këshillit të Lartë të Drejtësisë dhe inspektorët në zyrën e Prokurorit të Përgjithshëm, përfundon tre muaj nga hyrja në fuqi e këtij ligji, sipas dispozitave në fuqi, para hyrjes në fuqi të këtij ligji”, ka thënë Gjoni

Ministrja Gjonaj u përgjigj, duke thënë se për procedimet disipinore të papërfunduara afati është deri në 6 muaj. Ajo shton më tej , se Gjykata Kushtetuese ka shfuqizuar një pjesë të ligjit për shkeljet disiplinore.

“Kreu 1 i ligjit flet për përgjegjësinë disiplinore civile dhe penale dhe ne e kemi interpretuar shumë herët edhe në mbledhje të mëparshme, ku kemi thënë që, për sa kohë që Gjykata Kushtetuese ka shfuqizuar këtë pjesë të shkeljeve disiplinore, atëherë ne i referohemi nenit 140 të Kushtetutës dhe kjo është një gjë që është thënë dhe është në zbatim dhe në interpretimin më të drejtë të ligjit. Kështu që, ministri i Drejtësisë ka të drejtë të bëjë propozimet për masat disiplinore në bazë të ligjit ?Për statusin e gjyqtarëve dhe prokurorëve? dhe Kushtetutës, neni 140, paragrafi i dytë”, u përgjigj ministrja.

Ndërsa sipas gjyqtarit Gjoni, kjo procedurë ndryshoi me ministren aktuale dhe një gjë e mëparshme nuk kishte ndodhur me parardhësit e saj.

Ministrja Gjonaj ka përsëritur edhe njëherë, se si tek neni 160, si tek neni 72, ministri propozon në bazë të raportit të Inspektoriatit. Ndërkohë Gjoni e ka akuzuar se po bën përzgjedhje selektive të kompetencave. /CNA.al