Rama "shpërblen" miqtë me tendera korruptivë/ Zbuloni sa kanë fituar deputetët socialistë

20 Qershor 2018, 13:58, Aktualitet CNA

Drejtuesja e Departamentit të Antikorrupsionit, Lealba Pelinku, ka denoncuar politikat klienteliste të shefit të qeverisë. Sipas saj, Rama i shpërndan tenderat në mënyrë korruptive, tek miqtë ose deputetët me të cilët mban pushtetin.

Pelinku shton, se ai që ka përfituar më shumë është ish-Ministri i Shëndetësisë, Ilir Beqaj. Ajo përmend këtu rastin më të fundit, ku kompania Intech+ e zotëruar de facto prej Beqajt, fitoi tenderin prej 1.1 milionë eurosh pa garë. Ndërkohë në total shuma e fituar nga Beqaj për tenderat gjatë qeverisjes së Ramës, shkon deri në 29 milionë euro.

Sipas Pelinkut, jo vetëm Beqaj, por ka edhe deputetë të tjerë që kanë përfituar nga paratë publike. Sadri Abazi ka përfituar 34 milionë euro. Ndërsa dy deputetët e tjerë socialistë Xhemal Qefalia dhe Pjerin Ndreu, kanë përfituar respektivisht 8.1 dhe 7 milionë euro.

Drejtoresha e Antikorrupsionit shton më tej, se në total kjo shumë kap shifrën e 78 milionë eurove. Sipas Pelinkut, kjo është dëshmi e qartë se qëllimi i Ramës është pasurimi i tij dhe miqve që e rrethojnë.

Deklarata e plotë

Që kur ka ardhur në pushtet, Edi Rama e ka përqëndruar shpërndarjen e taksave të rritura të shqiptarëve në pak duar, që janë ose miq të tij, ose klientë, ose deputetë, me të cilët blen dhe mban pushtetin.

Janë të paktën 4 deputetë të tij që përfitojnë para publike nëpërmjet kompanive të tyre, në shumicën dërrmuese të rasteve pa garë.

Ilir Beqaj është njeriu më i afërt i Edi Ramës, i cili, edhe pse nuk është më ministër vzhdon të marrë me qindra milionë lekë nga taksat e shqiptarëve.

Rasti më i fundit është ai i shpalljes fituese të kompanisë ?Intech+?, e zotëruar de facto prej Beqajt. Në një tender pa asnjë konkurent, shoqëria e ish ministrit që rrënoi shëndetësinë, u shpall fituese për 1 mld e 362 mln lekë ose 1,1 mln euro, duke patur ofertë gati të njëjtë me fondin limit, pa i kursyer buxhetit gati asnjë qindarkë.

1.1 milionë euro, të fituara së fundmi nga taksat e rritura të shqiptarëve, i shtohen pasurisë së Ilir Beqjes, i cili, që kur Rama është bërë kryeministër, ka përfituar tedera me vlerë 29 milionë euro.

Ilir Beqja nuk është i vetëm në listën e deputetëve të Edi Ramës që pasurohen me paratë e shqiptarëve.

Prej kohës kur Edi Rama është kryeministër, Sadri Abazi ka fituar tendera me vlerë 34 milionë euro nga paratë publike. Media raportoi pak kohë më parë se në shumë prej tenderave, kompania ka paraqitur dokumentacion fallco, por nga prokuroria, nën kontrollin e Edi Ramës, nuk ka asnjë reagim.

2 deputetët e tjerë të partisë Socialiste, Xhemal Qefalia dhe Pjerin Ndreu, kanë përfituar secili nga tenderat publikë prej 8.1 dhe 7 milionë euro.

Këta të 4 deputetë të Edi Ramës, Ilir Beqja, Sadri Abazi, Xhemal Qefalia dhe Pjerin Ndreu kanë përfituar së bashku 78 milionë euro nga paratë publike të shqiptarëve, të cilëve ata u kanë rritur çdo vit taksat në parlament.

78 milionë euro nga pasuria publike për 4 deputetë është rekord i babëzisë së pushtetit të Edi Ramës, i cili si qëllim të vetëm ka pasurimin e tij dhe të njërëzve të afërt të tij për të blerë pushtetin dhe për të sunduar shqiptarët.

Të tilla rekorde korruptive janë një nga pengesat madhore të hapjes së negociatave për anëtarësimin në Bashkimin Europian. CNA.al