Një vit nga dhuna në Kuvendin e Maqedonisë, akti ende pa epilog gjyqësor

26 Prill 2018, 18:25, Aktualitet CNA

Të premten bëhet një vit nga pushtimi i Kuvendit të Maqedonisë prej një grupi protestuesish opozitarë, të cilët kundërshtonin zgjedhjet e kryetarit shqiptar të institucionit ligjvënës.

Ithtarët e VMRO-së, që atë kohë drejtohej nga kryeministri Nikolla Gruevski, më 27 prill 2017 jo vetëm që pushtuan Kuvendin, por edhe ushtruan dhunë mbi deputetët e opozitës së atëhershme, Lidhjes Socialdemokrate të kryeministrit të tanishëm, Zoran Zaev.

Kreu i LSDM-së pësoi lëndime të rënda, por më së keqi e pësoi kryetar i Aleancës për Shqiptarët, Ziadin Sela, i cili një kohë të gjatë u trajtua në spitale për shkak të lëndimeve të rënda, para se gjithash në kokë. Lëndime pësuan edhe edhe deputetë të tjera, si ministrja aktuale e Mbrojtjes, Radmilla Sheqerinska dhe shumë zyrtarë tjerë të lartë të Qeverisë së tanishme.

Ndërhyrja në Kuvend ishte bërë pa ndonjë problem të madh, pasi protestuesit fare nuk ishin penguar nga Policia, e cila për disa orë thuajse nuk ka ndërmarrë asnjë veprim për të mbrojtur deputetët, të cilët ishin në shënjestër nga grupet protestuese, drejtuesit e të cilëve por edhe shumë zyrtarë të tjerë, tani po gjykohen për veprën penale ?rrezikim terrorist i sigurisë dhe rendit kushtetues?.

Akuza ndaj tyre është ngritur para një muaji apo pothuajse një vit nga ngjarjet e dhunshme. Procesi parahetues është përcjell me ngecje e pengesa nga më të ndryshmet. Megjithatë, Prokuroria beson në mbarëvajtjen e tij dhe sigurimin e dëshmive të mjaftueshme për të vërtetuar akuzën e ngritur.

?Hetimi i gjithanshëm ka vërtetuar dhe jam i bindur se në procedurën gjyqësore edhe do të dëshmohet se të akuzuarit kanë vepruar me qëllim e njëjtë duke kryer vepra të koordinuar dhe të ndërlidhura njëra me tjetrën, e që kanë të bëjnë me veprën penale me të cilën ngarkohen?, ka deklaruar prokurori Lubomir Jovevski.

Me akuzën për terrorizëm janë ngarkuar 28 persona, përfshirë edhe disa zyrtarë të lartë si ish-ministrin e Punëve të Brendshme, Mitko Çavkov, pesë deputetë të VMRO-së që kishin ndihmuar në hapjen e dyerve të Kuvendit, si dhe zyrtarët të tjerë dhe drejtues të grupit protestues.

Megjithatë, ekspertët thonë se mozaiku i personave të përfshirë në këtë ngjarje të rëndë nuk është ende i plotë, pasi sipas njohësit të çështjeve juridike Aleksandar Tortevski, mungojnë akterët kryesorë, apo ata që kanë urdhëruar dhe orkestruar gjithë aktin e dhunshëm.

Ziadin Sela nga Aleanca për Shqiptarët, që kishte marr lëndimet më të rënda nga dhuna e protestuesve, në një nga prononcimet e tij, këtë ngjarje pati etiketuar si ?atentat? ndaj kërkesave të shqiptarëve…/ REL- Shkrimi vjen i redaktuar nga CNA,al/