E fundit!

13:58 Aktualitet

SPAK sekuestron pasurinë në pronësinë indirekte të Belinda Ballukut

Prokuroria e Posaçme ka vendosur masën e sekuestrimit pasu...

Çfarë shpërblimi po pret “perandori i shkurtër i financave” Benet Beci nga qeveria e të “gjatit”?

23 Prill 2018, 12:05, Aktualitet CNA

Fondi Shqiptar i Zhvillimit ka filluar të bëhet gjithnjë e më i dukshëm nëpër aktivitete që mbajnë logon e qeverisë.

Nëse deri tani ky institucion dhe drejtori i tij ekzekutiv, Benet Beci, preferonin të punonin kryesisht në heshtje, ka ca muaj që të dy kanë filluar të dalin mejdanit.

Si pasojë, me të drejtë shumëkush po pyet, çfarë po ndodh me FSHZH dhe drejtorin e tij?

Pak javë më parë FSHZH ishte një nga donatorët e Panairit Mesdhetar të Turizmit, që për hir të së vërtetës vetëm emrin kishte të tillë.

Mirëpo pronarëve të Expo City-t u duheshin dhënë ca para kështu që Beneti natyrisht që do të bindej.

Për më tepër që në lojë ishte edhe ministri Blendi Klosi, por edhe vetë kryeministri Rama, i cili ishte prezent në ceremoninë e hapjes dhe një nga shoqëruesit e nderit ishte edhe drejtori Beci.

Kjo u pa të ndodhte në një ceremoni të madhe, por FSHZH ka filluar të bëhet e dukshme edhe para, edhe pas panairit.

Pra diçka ka filluar të lëvizë. Po çfarë? Një nga të rejat që vijnë nga ky front është që Beci, tanimë në pozita super të forta pranë Ramës, nuk është i kënaqur nga fondet e qeverisë dhe donatorëve. Do më shumë.

Dhe lajmi gjysmë zyrtar është që Rama do ta kënaqë këtë kërkesë që vjen nga një personazh i fortë si Beci duke i dhënë për administrim edhe Fondet e Zhvillimit të Rajoneve që janë një llokme e majme parash.

Kështu drejtori perandor, i njohur edhe për jetën luksoze që ka ndërtuar (gjithashtu në hije), në vilën e ndërtuar në fshatin Prush (me paratë e FSHZH ka çuar edhe rrugën deri tek dera e shtëpisë), pret të fuqizohet akoma edhe më shumë.

FSHZH dhe Benet Beci nuk do të jetë më vetëm një institucion që përdor siç do vetë fondet e veta, por edhe do të shpërndajë për institucione të tjera para, natyrisht sipas preferencave të veta.

Ka zëra të tjerë që thotë që Becin mund ta shohim në sesionin e ardhshëm edhe si deputet të Kuvendit të Shqipërisë. Por deri atëherë ka kohë dhe me pushtetin që ka mbledhur përreth, nuk do të ishte çudi që perandori Beci të ishte edhe pjesë e qeverisë, siç është pjesë e pushtetit financiar në hije, në këtë vend./Pamfleti.com