Gjysëm toni kokainë “zhduket” nga Krimet e Rënda/ Zbardhen detajet

20 Prill 2018, 11:13, Aktualitet CNA

Pas vendimit të Gjykatës së Lartë lidhur me kompetencat e Prokurorisë së Krimeve të Rënda, tashmë dosja e 613 kg kokainë në Durrësit, i ka kaluar prokurorisë së Durrësit. Ndryshimi i kompetencave të Gjykatës dhe Prokurorisë së Krimeve të Rënda, ndryshuan në kuadër të zbatimit të Reformës në Drejtësi.

Gjykata e Lartë bazuar në dosje për trafik droge të paraqitur për interpretim nga Gjykata e Durrësit, vendosi që Krimet e Rënda të hetojnë vetëm çështje që janë kompetencë e SPAK, si korrupsioni në nivele të larta dhe krimi i organizuar.

Thënë ndryshe, ndër të tjera Krimet e Rënda do të hetojnë rastet, kur kanë të bëjnë me grupe të strukturuara kriminale.

Por, çfarë ndodhi në rastin e bllokimin të gjysëm toni kokainë?

Kujtojmë se gjatë një konference për shtyp nga drejtues të lartë të Policisë së Shtetit dhe drejtues të Krimeve të Rënda, u trumbetua se kishin të bënin me një grup të strukturuar kriminal.

Ndërkaq Krimet e Rënda janë shpallur moskompetentë nga Gjykata e Lartë për procedimin e mëtejshëm të këtij rasti.

Natyrshëm shtrohen pyetjet a nuk arritën ?Krimet e Rënda? që të provonin se kishin të bënin me një grup të strukturuar kriminal, kishin presione apo për shkak të interesit të madh politik e publik, ishin interesuar për ta larguar këtë çështje?

Kreu i Prokurorisë për Krime të Rënda Besim Hajdarmataj, në një intervistë për CNA.al, ka mënjanuar përgjigjet konkrete, duke cituar kompetencat që ka institucioni që ai drejton.

?Prokuroria për Krime të Rënda si dhe Gjykata vazhdojnë të jenë kompetente për veprat penale të kryera në formën e Grupit të Strukturuar Kriminal sipas parashikimit të nenit 333/a te K.Penal. Këto çështje do të vazhdojnë të hetohen nga kjo prokurori në bazë të ligjit material dhe procedurial në fuqi?, është shprehur Hajdarmataj për CNA.al.

Më 28 shkurt, Policia e Shtetit në bashkëpunim me Prokurorinë e Krimeve të Rënda dhe Drejtorinë e Hetimit Doganor,ka arritur të finalizojë operacionin e koduar ?Last Snow?.

Si rezultat i këtij operacioni u bë i mundur kapja dhe sekuestrimi i një sasie rekord prej 613 kilogramë e 350 gramë lënde narkotike e dyshuar kokainë, me vlerë tregu mbi 180 milion euro.

Lënda narkotike ishte nisur me kontenier nga Kolumbia duke kaluar tranzit përmes Italisë, në Maltë e më pas me anije ka mbërritur në Portin e Durrësit në Shqipëri, në datën 19 shkurt 2018.

Kokaina ishte e fshehur në kontenier me dysheme të dyfishtë, të ngarkuar me banane.

Deri më tani të arrestuar ndodhen magazinieri dhe shoferi, përkatësisht Donaldo Lushaj dhe Armando Pezaku, ndërsa është shpallur në kërkim ndërkombëtar Arbër Çekaj (Kuliçi)./CNA.al