Gati prangat për politikanët e korruptuar/ Zbulohen emrat e prokurorëve që do kryejnë arrestimet

6 Shkurt 2018, 08:55, Aktualitet CNA

Kryeprokurorja Arta Marku ka nisur procedurat për të ngritur prokuroritë speciale në 9 qarqe të vendit, me qëllim luftimin e korrupsionit dhe krimit të organizuar.

Javën që lamë pas Marku nënshkroi një memorandum bashkëpunim me ministrin e Brendshëm, Fatmir Xhafaj, me qëllim ngritjen e disa strukturave, që do të jenë të ngjashme me SPAK. Duke qenë se në paktin e firmosur mes tyre puna duhet të niste brenda 5 ditësh, kryeprokurorja ka marrë të gjitha masat e duhura. Në shumë qytete ka filluar përzgjedhja e prokurorëve që do të jenë pjesë e njësive, ndërsa dje vetë zonja Marku ishte në Shkodër.

Aty u diskutua për analizën vjetore të prokurorisë, por njëkohësisht u fol dhe për strukturën speciale që do të ngrihet. Sipas burimeve, brenda kësaj jave strukturat e posaçme në: Prokurorinë e Krimeve të Rënda, në Tiranë, Durrës, Elbasan, Shkodër, Vlorë, Fier, Korçë, Gjirokastër, Lezhë do të jenë gati.

Ndërkohë dje janë bërë të ditur dhe emrat paraprakë të prokurove që do të jenë pjesë e strukturave në Tiranë dhe te Krimet e Rënda. Sipas informacioneve, Marku ka vendosur që të emërojë në pozicione ata emra që kanë qenë pjesë e njësisë antikorrupsion, njësi e cila u ngrit nga Adriatik Llalla dhe më pas u shkri.

Anëtarët e prokurorive speciale

Sa i takon anëtarëve të strukturës së posaçme te Krimet e Rënda, ata janë: Ervin Kondili, Ened Nakuçi, Klodian Braho dhe Sonila Domi. Emrat e mësipërm janë të njohur në fushën e drejtësisë penale, pasi kanë pasur në dorë mjaft çështje të ndjeshme.

Ervin Kondilli, është prokurori i cili po heton vrasjen e efektivit në Lazarat, gjatë operacionit që bëri policia. Po ashtu ai ka hetuar dhe Admir Tafilin, i cili ndodhet në burg i dënuar. Ened Nakuçi, është një tjetër prokuror i njohur.

Momentalisht ai është pjesë e grupit të prokurorëve që po hetojnë Emiliano Shullazin, ndërsa ka hetuar dhe Arben Frrokun. Klodian Braho, ka pasur në dorë hetimet ndaj ish-kryebashkiakut të Dibrës, Shukri Xhelili, ndërsa po ashtu ka hetuar gjyqtarin Shkëlqim Miri.

Po ashtu ai kërkoi konfiskimin e pasurisë për ish-deputetin Mark Frroku. Ndërsa Sonila Domi, është prokurorja që arrestoi ish-kreun e Interpol Tirana, Artan Bajraktari. Ndërsa struktura e posaçme te Prokuroria e Tiranës do të ketë në përbërje prokurorët: Anida Qilimi, Armand Gurakuqi, Elsa Miha, Daniela Sula, Antoneta Sevdari. Anisa Qilimi është prokurorja që urdhëroi pezullimin e Haki Çakos për pajisjen e përgjimit. Armand Gurakuqi, ka hetuar prokurorin Haxhi Giu, i cili u dënua për korrupsion.

Prokurorja Elsa Miha, hetoi ish-kreun e Tatimeve Adrokli Kokthi. Daniela Sula Arrestoi 9 zyrtarë dhe farmacistë për skandalin e rimbursimeve me ilaçet, pak vite më parë. Ndërsa Antoneta Sevdari, arrestoi kryebashkiakun e Kamzës, Xhelal Mziun./sot