E fundit!

22:27 Ekonomi

Hyn në fuqi rregullorja e re/ Licencat e shoqërive në ndërtim do të vlejnë deri në 5 vjet

Licencat e shoqërive të ndërtimit do të kenë afat vlefshmë...

Kalaja e Bashtovës pastrohet nga shkurret e ferrat

4 Janar 2018, 18:54, Aktualitet CNA

Viti 2017 në Durrës u mbyll me dy avantazhe përsa i përket bërjes së vizitueshme të monumenteve arkeologjike. Pas mureve antike në Portoromano i erdhi radha Kalasë së Bashtovës. Kjo kala gjendet në Qarkun e Tiranës, por nën juridiksionin e Drejtorisë së Monumenteve të Kulturës të Durrësit. Në Kalanë e Bashtovës u bë pastrimi rrënjësor i gjithë perimetrit të mureve nga shkurret dhe ferrat. Ky pastrim ndihmon në bërjen e këtij monumenti të vizitueshëm nga turistët. Njëlloj si në rastin e mureve antike në Portoromano-Durrës edhe në rastin e kësaj kalaje shteti e bëri detyrën e vet, ndërsa i mbetet privatit të zgjerojë ofertën e turizmit kulturor në Shqipëri duke shtuar edhe këto dy monumente kulture, të cilat padyshim janë një atraksion i pazakontë vecanërisht për turistët e huaj.

Bashkëpunimi me ushtrinë

Si në rastin e Kalasë së Bashtovës edhe në rastin e Kalasë së Persqopit dhe të varrit monumental të Persqopit (Qarku Tiranë) ushtria shqiptare me forcat dhe mjetet e veta ka bërë pastrimin e gjithë perimetrit të mureve nga shkurret dhe ferrat duke i bërë këto objekte të trashëgimisë sonë arkeologjike më të vizitueshme, për rrjedhojë duke ndihmuar në pasurimin e ofertës së turizmit kulturor në Shqipëri. Personalisht mendoj se po abuzohet me përdorimin e ushtrisë vend e pa vend. I kujtoj si Xhackës së Gjallicës edhe Mrikës së Lulzimes më parë se me kushtetutë Forcat e Armatosura Shqiptare në rradhë të parë duhen për luftë, për mbrojtjen e sovranitetit dhe tërësisë territoriale të Shqipërisë, për mbrojtjen e rendit kushtetues, për të përmbushur detyrimet ndërkombëtare të shtetit shqiptar dhe më pas edhe për të ndihmuar popullatën në raste fatkeqësish natyrore si përmbytje, tërmete, orteqe etj.

Përdorimi i forcave dhe mjeteve të ushtrisë edhe kur nuk ka emergjenca për veprimtari të tilla tipike komunale si pastrim plehrash, në plazhe e buzë rrugëve nacionale apo edhe shkulje e prerje ferrash e shkurresh në monumente të ndryshme kulture si në dy rastet e mësipërme është disi abuzim. Ushtria nuk është mjet për të bërë punën dhe për të kryer detyrat, që i takojnë ndërmarrjeve komunale të pushtetit lokal apo për të bërë punë të tilla të rëndomta si pastrim ferrash rrëzë mureve të kalave! /GJERGJ THANASI /CityNews