Monika dhe Luli apo Rama/ Kush fiton apo humb "betejën" e nesërme

17 Dhjetor 2017, 17:23, Aktualitet CNA

Nesër Parlamenti në kulmin e tensioneve politike dhe pas shumë debateve për procedurën dhe kushtetutshmërinë, pritet të ketë në diskutim zgjedhjen e PPP (Prokurorit të Përgjithshëm të Përkohshëm).

Socialistët brenda javës në kundërshtim të hapur me Kushtetutën, hapën garën për PPP-në, ndërkohë demokratët dhe LSI kundërshtuan hapur procesin e ndjekur nga Komisioni i Ligjeve. Megjithëse prokurorin e propozon KLP (Këshilli i Lartë i Prokurorisë) dhe e miraton Parlamenti me 3/5 e votave, nesër do të kemi një betejë me dy fronte. Një jashtë Parlamentit, ku PD dhe LSI kanë thirru mbështetësit e tyre, dhe një brenda Parlamentit, ku deputetë e PD- dhe LSI do të tentojnë bllokimin e votimit të PPP.

Demokratët dhe LSI kërkojnë zbatimin e Kushtetutës, madje PD i ka dhënë edhe zgjidhje, duke kërkuar përshpejtimin e zgjedhjes së anëtarëve të KLP dhe qëndrimin e Adriatik Llallës në detyrë, deri në përfundimin e procedurës për zgjedhjen e prokurorit të ri. socialistët qëndrojnë të vendosur. Të paktën deri në këto momente për të zgjedhur njërin prej dy emrave, Ferdinand Elezi dhe Arta Marku.

Kandidati i parë Ferdinand Elezi, mësohet se ka mbështetjen e kryebashkiakut të Durrësit, Vangjush Dakos dhe është rekomanduar prej tij, e dyta Arta Marku, mësohet se ka mbështetjen e Ulsi Manjës, por në fakt ajo është kandidaturë e Ermonela Felajt, ish-ministres së Edi Ramës.

Gazetarët e kronikës, si Klodiana Lala, Artan Hoxha etj., dhe shumë media pranë PS raportojnë se Arta Marku është e preferuara, por askush nuk përjashton dy mundësitë e tjera, zgjedhjen e Ferdinand Elezit, ose braktisjen në fund të këtyre kandidatëve dhe hapjen e rrugës nga Edi Rama, për të gjetur një Kryeprokuror të ri në zbatim të Kushtetutës.

Beteja brenda socialistëve, midis kandidatit të Vangjush Dakos, dhe kandidates Manja-Felaj, është më shumë një betejë e Edi Ramës me opinionin publik. Dy kandidatët janë të tijët, të futur në garë me një procedurë totalisht anti-kushtetuese. Nesër përballë antikushtetutshmërisë së Edi Ramës do të qëndrojë një protestë, e quajtur ndryshe tallavaje e dyshes Basha-Kryemadhi. Edi Rama provokon dhe tërheq vëmendjen nga aktualiteti dhe pikat e nxehta të debatit politik, ndërsa Monika dhe Luli hapin një pistë të re politike për të certifikuar “dashurinë” e tyre.

Asnjë nga palët nuk ka hall Kryeprokurorin, ka të tjera halle edhe më të mëdha. Nesër disa jashtë e disa brenda do të tregojnë forcën e tyre ndaj opinionit publik. Rama me grushtin e fortë të Ruçit, duke tentuar të zgjedhë midis dy kandidatëve të tij, Luli me Monikën, të tregojnë sa forcë kanë kur janë bashkë. Në fund nuk ka fitues, ka vetëm të humbur tension dhe show politik, i radhës ku kuptohet, si gjithmonë humbësit janë shqiptarët. /CityNews