E fundit!

15:16 Aktualitet

Komunikimi me Ramën dhe kërcënimi nga Bajrat/ Koçeku flet për largimin nga Grupi i PS-së

Deputetja Marjana Koçeku ka folur ditën e sotme lidhur me ...

Klosi: Aleancë me akademikët për pastrimin e Shqipërisë

23 Nëntor 2017, 16:43, Aktualitet CNA

Ministri i Turizmit dhe Mjedisit, Z. Blendi Klosi prezantoi sot programin e hartuar në kuadër të operacionit “Pastrojmë Shqipërinë që duam”, që do të zhvillohet në periudhën 24 Nëntor 2017 – 24 Maj 2018 për pastrimin e Shqipërisë. Takimi, i mbështetur nga GIZ, mblodhi së bashku ekspertë të fushës, akademikë dhe gazetarë për njohjen me programin e të gjithë aktiviteteve që garantojnë siguri mjedisore në Shqipëri dhe planin e detajuar të punës në funksion të aksionit për pastrimin e mjedisit në Republikën e Shqipërisë.

Ministri Klosi kërkoi aleancën e ekspertëve, akademikëve dhe shoqërisë civile për të realizuar operacionin e pastrimit të mjedisit shqiptar duke theksuar se hinka e sistemit është leja mjedisore.

“Ajo që do të kërkoja sot është aleanca me ju dhe diskutimi fare i sinqertë me ju, sesi do të operojmë në 6 muajt që do të vijnë që çdo gjë të bëhet e mirëstrukturar, çdo gjë e cila ka një hallkë që mund të shërbejë si një hinkë e vërtetë për të menaxhuar gjithë këtë operacion disavjeçar. Dhe për mendimin tim kjo hallkë është leja mjedisore, hinka në të cilën kalojnë ose jo problematikat e sistemit është leja mjedisore. Nëse ne, dhe kjo është një nga pikat më të rëndësishme që unë doja të ndaja me ju, menaxhojmë së bashku në mënyrë shkencore, në mënyrë transparente, në mënyrë inxhinierike çdo leje mjedisore për ta bërë atë jo një pikë ku sistemi bie, jo një pikë ku sistemi dëmtohet, jo një pikë ku sistemi bëhet i gjithi i dyshimtë, por në një pikë e cila kërkon forcën e zbatimit të ligjit, unë mendoj që i gjithë sistemi mund të ndërtohet.”-tha ministri Klosi duke prezantuar para të pranishmëve edhe kreun e ri të Agjencisë Kombëtare të Mjedisit, Edison Konomi, ish-deputet i PS.

Gjatë fjalës së tij ministri Klosi kërkoi edhe ngritjen e urdhërit të punonjësit mjedisor.

“Nga eksperienca ime administrative mendoj që edhe në fushën e mjedisit ka ardhur koha që ne të ngrejmë urdhërin e punonjësit mjedisor.”, – u shpreh Klosi.

Duke theksuar punën për mbushjen e vakuumit ligjor ministri Klosi theksoi ndalimin e prodhimit dhe importimit të qeseve të pariciklueshme pas datës 1 janar 2018. Ndër projektet e tjera për sigurinë mjedisore ministri Klosi përmendi edhe pastrimin e 9 grykëderdhjeve të lumenjve për të frenuar në këtë mënyrë ndotjen e vijës bregdetare. /CityNews