Nga laboratori i fizikanëve në Itali/ Mimoza Hafizi: “Nëse shkenca mbytet, gëlojnë sharlatanët”

8 Shtator 2017, 08:13, Aktualitet CNA

Deputetja Mimoza Hafizi prej disa javësh tashmë që prej zgjedhjeve të 25 qershorit ka shkuar në Itali ku po merr pjesë në disa seminare të Universitetit Ferrara.

Referuar zhvillimeve të fundit në Shqipëri ajo shkruan për atë që pritet të ndodhë në Akademinë e Shkencave.

STATUSI I PLOTË

Sot në laboratorin LARIX, vepër autentike e fizikanëve të Universitetit Ferrara.

Rrezet X udhëtojnë në tubin e shtrirë në tunelin nëntokësor 70 m të gjatë dhe më pas detektohen, për të testuar aftësitë e satelitëve hapësinorë të studimit të ngjarjeve kozmike me energji të lartë.
Ky projekt disavjeçar është ngritur me financime modeste, por me pasionin e komunitetit shkencor të fizikanëve që mund të japin gjithshka, kur respektohen dhe çmohen nga shoqëria dhe shteti. Siç është rasti i fizikanëve të Universitetit qindravjeçar të Ferraras-më shpjeguan sot kolegët Cristiano Guidorzi dhe Piero Rosati, Profesorë në Departamentin e Fizikës.

Ka një debat shqetësues sot për shkencën në Shqipëri, që në fakt tenton të kërcënojë fondet e vobekëta të kërkimit shkencor. Debat i ushqyer nga politika që rend pas pleshtit vetëm për të djegur jorganin ! Politikë që s?la gjë pa bërë për të degraduar mjedisin akademik, përmes përçmimit buxhetor, përmes promovimit të njerëzve sipas gustove partiake apo përmes bllokimit të kërkimeve doktorale në dobi të klientëve privatë. Kjo politikë që ka bllokuar zgjedhjet e saj të brendshme dhe ka degraduar zgjedhjet parlamentare, nuk ka asnjë leksion moral për t?i mbajtur bashkësisë akademike.

Por, a duhet financuar shkenca në një vend të varfër si Shqipëria ?
Fatmirësisht ky debat përkon me disa pozicione dhe shkrime absurde lidhur me heroin tonë kombëtar, si për të na ilustruar «par excellence » se ç?mund të ndodhë nëse mjedisi shkencor mbytet. Gjithfarë amatorësh, obskurësh, sharlatanësh e injorantësh mund të gëlojnë në tokën e lënë djerrë.

Çdo shoqëri, e pasur a e varfër qoftë, ka nevojë për shkencëtarët, njerëzit modestë para pafundësisë së hapësirës dhe kohës, kalorësit fisnikë të së vërtetës. Që ndoshta nuk ia dalin dot të gërmojnë tunele, si fizikanët e Universitetit të Ferraras, por sëpaku mund të mbajnë gjallë ekuilibrin shpirtëror të kombit, që pa ta mund të zhvendoset drejt honeve të rrezikshme.

/Citynews