Turpi i politikës/ Shqiptarët dashurojnë shtetin autoritarist dhe ekonominë komuniste

20 Gusht 2017, 13:15, Aktualitet CNA

Ndonëse nga rrënia e Murit të Berlinit, që ndante sistemet autoritare nga ato demokratike, kanë kaluar rreth tridhjetë vite dhe nga periudha paskomuniste shqiptare rreth 27 vite, përsëri politika nuk ja ka dalë tu fusë në zemër taksapaguesve dëshirën për demokracinë.

Kjo pasi gjithsa ajo ka sjellë në realitetin e përditshëm ka qenë krijimi i idesë se kapitalizmi demokratik nuk është veçse sistemi i batakçinjve. Ku ligji shkelet sipas qejfit, ku politikanët, qeveritarët, deputetët gjyqtarët, prokurorët etj., përfaqësues të nomeklaturës janë njerëz jashtë ligjit. Ku zhvatet, vidhet, bëhet korrupsion e afera dhe gjithçka legjitimohet nëse paguan ?kompetentët? e pushteteve etj.

Ka ndodhur kjo ndërkohë që realiteti shqiptar përveç tregut të plencit, të gjesë së gjallë, fruta perimeve etj., nuk ka sjellë asnjë nga elementet e tjera zilindjellëse të demokracisë perëndimore, që është sistemi më i mirë midis gjithë të këqinjve.

Duke parë vetëm disa nga anët e errëta të tij dhe jo pozitivitetet është i justifikueshëm fakti që vetëm gjysma e taksapaguesve preferojnë të kenë një sistem demokratik, ndërkohë që tridhjetë e një përqind e tyre janë nostalgjik të sistemeve autoritare.

Të dhenat e raportuara nga Banka Europiane për Rindërtim dhe Zhvillim (BERZH), që thonë se 31% e shqiptarëve preferojnë më shumë një sistem autoritar qeverisjeje sesa demokracinë që e preferojnë rreth 50 % janë treguesi më i mirë i paaftësisë së politikës për ta konvertuar ish sistemin totalitar komunist në sistem të vlerave demokratike.

Është kjo paaftësi, në mos qoftë strategjia e Katovicës Ramiziste, që, po sipas raportit të BERZH: pjesa e shqiptarëve që duan qeverisje autoritare është tre herë më e lartë sesa ajo e qytetarëve të Europës Perëndimore. Madje është më e lartë edhe sesa mesatarja e popujve të ish-vendeve komuniste të ngjashme me Shqipërinë, ku treguesi raportohet të jetë 28%.
Po ajo që e ngarkon me faj të rendë klasën politike paskomuniste është e dhena tjetër e raportit BERZH që konfirmon se, me kalimin e viteve, në vend të vinte duke u ulur, dashuria e shqiptarëve për autoritarizmin ka ardhur duke u shtuar, ndërkohë që ajo për demokracinë është ulur akoma më shumë .

Raporti i mësipërm thotë se në gjashtë vitet e fundit, nga 57% që ishte vlerësimi I shqiptarëve për demokracinë ka renë në 50% dhe një e treta e tyre dëshirojnë të kenë një ekonomi plani të centralizuar, si ajo e regjimit komunist. Shifër kjo që është 13 pikë përqindje më e lartë sesa mesatarja e vendeve të Europës Perëndimore. /CityNews