Rama-Meta/ Infrastruktura dështimi i madh i Rilindjes

17 Prill 2017, 12:40, Aktualitet CNA

Pak ditë më parë Parlamenti miratoi fondin shtesë prej 50 miliard lekë për aksin rrugor Tiranë Elbasan, duke ngritur kështu në vëmendje investimet e bëra nga qeveria e Rama gjatë këtyre viteve të shkuara. Investime që në krahasueshmëri rezultojnë të kenë qenë jashtë vëmendjes dhe një dështim i madh i rilindjes.

Përgjatë katër viteve të ikura ministria e linjës së infrastrukturës është drejtuar nga LSI, ministri më i fundit i të cilës, Sokol Dervishaj, është trashëgues i iniciativave të para ardhësit Haxhinasto që shtesat e fondeve i kishte praktikë pune.

Për të argumentuar konkluzionin mjafton të sjellim në vëmendje faktin që në gjithë segmentet infrastrukturore të veriut të vendit nuk gjen asnjë centimetër rrugë të realizuar përgjatë 4 viteve të qeverisë së rilindjes.

Punimet janë ndërprerë dhe asnjë lëvizje nuk ndjehet të jetë bërë për të përfunduar aksin Tiranë-Shkodër, nga Kamza në Milot, që në fakt shkurton jo vetëm rrugën e Shkodrës por edhe segmentet e Rrugës së Kombit dhe atë të Lezhës. Por në gjendje mospërfundimi ndodhte edhe aksi Golem-Rrogozhinë, i lenë pothuajse gati nga qeveria paraardhëse.

Segmenti i rrugës hyrëse për në qytetin e Pogradecit, segmenti i Qafë Plloçës, shkurtimi i rrugës Gjirokastër-Sarandë, në kthesën e Kardhiqit, që shkurton ndjeshëm rrugën drejt Sarandës, bajpasi i autostradës Fier-Vlorë, janë të tjera njesi infrastrukurore të lenë në mes ndonëse për to ish qeveria pararilindjes ka investuar jo pak fonde.

Madje edhe segmenti i rrugës Tiranë-Elbasan i inaguruar në 2013, që nga kjo kohë deri më sot nuk ka njohur hedhjen e asnjë lopate vijuese për ta përfunduar.

Në të kundërt të ndërmarrjes së financimeve ndër këto akse rrugore strategjike, qeveria e rilindjes është investuar në projekte lokale. Halli i madh i saj kanë qenë pedonalet e Kukësit, të Tepelenës, të Gramshit, Skraparit( ku duhet të dalë shëtitje Ilir Meta), të Dibrës etj., që së bashku me Lungomarren e Vlorës kanë ngrenë miliarda fonde të nxjerra nga buxheti i taksapaguesve që kurrë nuk u pyetën për përparësitë. Sikurse nuk u pyetën për milionat e hedhura për palmat e mbjella në rrugën Durrës-Tiranë, me fondin e të cilave mund të shtohej një korsi më shumë në këtë segment.

Ka edhe të tjera investime të nisura nga qeveria e mëparëshme e që rezultojnë të jenë zhvilluar më tej nga rilindja nisur nga interesi i përfitimit. Segmenti i Bulevardit të Ri, psh, u bllokua nga qeveria e rilindjes, për tu zhbllokuar pas ardhjes në krye të Bashkisë të Erion Velisë, i cili përveç miliardave të nxjerr nga buxheti i taksapaguesve ka si meritë edhe 250 milion eurot e kullës mbi njëqind kate që do të ngrihen në të. /CityNEWS