web counter
LEXO PA REKLAMA!

SHKARKO APP

App Store
Google Play

E fundit!

x

Paralajmërimi i gazetarit/ Kavaja, kronika e paralajmëruar e një trazire të stisur

14 Prill 2017, 08:37, Aktualitet CNA

Nga Denis DYRNJAJA

Dikush po përgatit një skenar destabilizimi para zgjedhjeve të qershorit, që pritet se provën dhe shkëndijën e parë do ta japë me një valë trazirash në zgjedhjet lokale në Kavajë. Ka të dhëna jo zyrtare, se është përgatitur një skemë sesi do të krijohet një valë incidentesh gjatë protestës së paralajmëruar të opozitës ditën e zgjedhjeve për kryebashkiakun e ri të qytetit, për të treguar se me këtë qeveri nuk mund të shkohet në zgjedhje. Skenari synon të fusë në kurth policinë e shtetit dhe pritet që përplasja e stisur të përfshijë edhe përdorimin e armëve, për ta bërë sa më të rëndë ngjarjen dhe për t’i faturuar Ministrit të Punëve të Brendshme Fatmir Xhafaj një incident që do ta shndërronte atë në objekt sulmesh politike dhe mediatike lidhur me të shkuarën e tij në sigurimin e shtetit, sikurse ka tentuar disa herë ta perqasë opozita, mediat apo individë të tjerë publikë pranë saj. Kjo qeveri mund të ketë një mal me gjynahe dhe probleme, por të shkosh deri te stisja e një konflikti që mund të krijonte pasoja për jetën e qytetarëve, të kujdo krahu qofshin ata, vetëm për të treguar se kjo është qeveri që vret ose se Ministri i Punëve të Brendshme është bartës i mendësisë diktatoriale, është më shumë se kriminale dhe djallëzore. Kjo është çmenduri dhe dezekuilibër mendor i përzier me ego të çmendur për pushtet. Vetsugjestionimi se drejt pushtetit shkohet me çdo mënyrë, ose qëllimi justifikon mjetin, janë opsione fatale për shqiptarët e keqpërdorur politikisht në këta 27 vjet demokraci në Shqipëri. Këto janë veprime në dëshpërim dhe nuk prodhojnë e tregojnë asgjë tjetër veç se një mungesë alternative besimi për të bindur njerëzit për ndryshim. Ndërsa i sheh elementët e këtij skenari, duket si kronika e paralajmëruar e një trazire të mirmenduar. Dhe skenari i ka kushtet edhe pse artificiale për ta vënë në jetë. Këto kushte sipas ideatorëve të këtij skenari me anarki janë klima politike e acaruar artificialisht. Kavaja njihet si qytet ku opozita ka mbështetje dhe e shkuara flet për një prej demonstratave më të forta antikomuniste atje. Ministri aktual i Punëve të Brendshme është akuzuar si nëpunës i nomenklaturës komuniste me të kaluar në sigurimin e shtetit, ndonëse këto akuza janë mohuar prej tij publikisht. Provokimet mund të jenë të forta në atë formë dhe ato mënyra, sa do të krijonin një klimë ekstreme politike ku pretendimi i vetëm dhe apsolut i opozitës do të ishte qeveria dhe vetëm qeveria teknike. Skenari i Kavajës mund ta vendosë policinë e shtetit në një sprovë të vështirë. Sepse ndërhyja dhe reagimi i saj ndaj një provokimi të rëndë sikurse pritet edhe me armë do ta kthente atë në një target të sulmuar politikisht si policia e dhunës dhe reminishencave diktatoriale, lidhur me faktin se tashmë Ministër i Punëve të Brendshme është Fatmir Xhafaj. Ndërsa mos reagimi i policisë do t’i jepte palës që mbështet aktet e dhunshme besimin se ka edhe forma alternative për të arritur qëllimet politike. Me këto veprime mund të sigurohet ajo atmosferë destabilizimi, e nevojshme për të shkëputur vëmendjen nga vazhdimi i Vettingut dhe zhvillimi i zgjedhjeve normale, në një vend që e ka rraskapitur anormaliteti politik për qëllimet e disa individëve që mbajnë peng qetësinë, stabilitetin dhe progresin e tij dhe i prishin ato sa herë iu nevojitet për interesa e përfitime personale. Sikurse shumica e njerëzve që duan qetësi dhe stabilitet do të doja që këto informacione dhe ky skenar të rezultonte një bllof ose konspiracion. Por nëse ky skenar ndodh, atëherë do të ishte fatalitet i madh dhe do të tregonte se jo vetëm opozita është marrë peng, por bashkë me të edhe shpresa se ky vend mund të gjejë paqe, përsa kohë mendjet e sëmura kriminale punojnë kundër stabilitetit, pasi janë kapur nga makthi se një ditë do të bëhet drejtësi për çdo faqezi./CityNews





Lajmet e fundit nga